Республикыште йоча-влакын тазалыкыштым пеҥгыдемдыме кеҥежымсе кампаний эрта.
Тений Марий Элыште 200 тыгай организаций пашам ышташ тӱҥалеш, тушто чумыр налмаште 7-18 ияш марте 20,5 тӱжем икшыве тазалыкшым пеҥгыдемден кертеш.
Моло ийласе семынак организаций-влак школ пелен почылтыт, ола деч ӧрдыжтӧ, тыгак профилян да палаткан лагерь-шамыч пашам ышташ тӱҥалыт.
Йоча-влакын кеҥеж канышышт дене кылдалтше йодышым тиде кечылаште Марий Эл правительстве председательын алмаштышыже О.Бадма-Халгаеван вуйлатымыж почеш эртыше межведомственный комиссийын заседанийыште каҥашеныт. Тудо каныме программым ямдылымылан да тыгодым йоча-влакын шонымашыштым шотыш налмылан тӱткышым ойыраш йодын. Комиссийын еҥже-влакын палемдымышт почеш, каныме кампанийыш шукырак икшыве ушныжо манын, муниципальный образованийласе администраций дене паша ышталтеш.
Г.Коженвикова
Фотом Марий Эл Образований да науко министерствын сайтше гыч налме
