Российысе общеобразовательный организацийлаште 2025 ийысе Иктешлыше кугыжаныш экзаменын (ЕГЭ) тӱҥ йыжыҥже эрта.
Икымше кечын выпускник-влак историй, литератур да химий дене шинчымашым ончыктеныт, 26-27 майыште математике (базовый да профилян) да 29-30 майыште руш йылме дене. Умбакыже тыгай кечылаште:
2 июнь – обществознаний, физике;
5 июнь – биологий, географий да йот йылме (письменный ужаш);
10 июнь – йот йылме (устный ужаш), информатике.
Историй, литератур да химий дене Иктешлыше кугыжаныш экзаменым республикыштына чылаже 700 выпускник кучен: химий дене – 372, историй дене – 339, литератур дене 92.
Россий Просвещений министр Сергей Кравцовын увертарымыж почеш, элна мучко Иктешлыше кугыжаныш экзаменым чылаже 11-ше классым тунем пытарыше 714 тӱжем выпускник куча. Тудо палемден: экзамен-влакын содержанийышт ий гыч ийыш уэмдалтеш.
Пытартыш жапыште самырык-влак коклаште естественно-научный циклыш пурышо предметлам (физикым, химийым, биологийым) ойырышо-влакын чотышт шукем толеш. Марий Элыштына ЕГЭ-лан профилян математикым да физикым ойырышо выпускник 2024 ийыште уло Российлан эн шуко лийын.
2020 ий гыч палемдыме предметла да математике дене кокла балл веле огыл, тыгак шуко баллым погышо-шамыч ешаралтыт, а эн изи «лондемым» вончен кертдыме-влакын чотышт шагалемеш.
Школым пытарыме нерген аттестатым налаш выпускник руш йылме дене 36 деч шагал огыл баллым погышаш, а профилян математике дене – 27-ым. Вузыш тунемаш пураш ЕГЭ-н результатше кӱкшырак лийшаш. Мутлан, руш йылме дене 40 балл деч шагал огыл погыман, профилян математике дене – 39, моло предмет-шамыч денат экзаменыште 39-40 балл деч шагал огыл поген кертман.
Шотыш налман: чыла вузышто балл шотышто йодмаш ик семын огыл, молан манаш гын тунемме вер-влак тӱрлӧ ведомствыш пурат. Мутлан, медицине вузлаште абитуриент-влаклан эн изи балл Тазалык аралтыш министерствын кӱштымашыже почеш пеҥгыдемдалтеш, педагогике направлениян – Россий Просвещений министерствын. Сандене ты шотышто уверым кажне тунемме верын официальный сайтышкыже пурен пален налман.
***
Марий Эл образований да науко министр Лариса Ревуцкая Йошкар-Оласе 14-ше №-ан гимназийыште лийын. «Куанен палемдем, экзамен-влакым эртарыме паша йодмаш-влак дене келшышын, штатный режим почеш эрта. Тиде ответственный татыште кажне выпускниклан йӧнан лийже, шкенжым ӱшанлын кучыжо манын тыршыме», – каласен министр.
Ончычсо ийласе семынак ЕГЭ пунктлаште видеэскерымаш камерым, кӱлешан оргтехникым вераҥдымылан кугу тӱткыш ойыралтын. Кажныштыже мер эскерыше-влак лийшаш улыт. Гимназийыште эртаралтше экзаменлаште ты кечын ача-ава общественностьын 19 еҥже лийын.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
