Кодшо арняште «Марий книга издательстве» савыктыш пӧртын, «Марий Эл», «Марийская правда», «Ямде лий» газет, «Ончыко», «Кече»/«Солнышко» журнал-влакын пашаеҥышт, Российын сулло, Марий Элын калык сӱретчыже Иван Ямбердов Волжский районысо Шарача школышто уна лийынна.
Кӧргыш пурымеке, школ вуйлатыше Ольга Гаврилова пашаеҥже-влак дене пырля мемнам порын вашлийын, актовый залыш ужатыш.
Коридорышто йӱкланыше икшыве-влакат ик жап гыч залыште вераҥыч, мемнан пуэдыме газетнам куанен лаштыклат.
Вашлиймашнам Волжский муниципальный район вуйлатыше Владимир Сергеев, Волжский администрацийын образований пӧлкажын увер-методике рӱдержым вуйлатыше Надежда Никифорова саламлымаш шомак дене почыч да республикысе журналист-влак, тыгак кумдан палыме сӱретче дене вашлиймашым кӱлешанлан шотлен ойлышт.
– Газетым але журналым кидыш налмеке, кажне материалым лудшо деке намиен шуктымо марте могайрак паша шукталтмым шоналтет да ӧраш веле кодеш, – каласыш Владимир Ильич.
Чынжымак, газет, журнал але книга савыкталтмешке паша шуко ышталтеш.
Савыктыш пӧрт вуйлатыше Эдуард Иманаев республикысе изданий-влак дене кӱчыкын палдарыш да предприятийыштын савыктен лукмо книгашт нерген каласкалыш.
Тиде районак Корамас кундем Чодыраялеш шочын-кушшо Иван Ямбердовын сӱретым лудаш туныктымыжым, ик мутын весе дене кылдалтмыж нерген каласкалымыжым йоча-влак куанен колыштыч, а шочмо йылмым йӧраташ да тудын дене пайдаланаш кӱлеш манмыжым чынлан шотлен, шокшо кидсовышым пӧлеклышт.
Меат, марий газет ден журнал-влакын журналистышт, шкенан пашана дене кӱчыкын палдарышна да нунылан подпискым ышташ темлышна.
Вашлиймашнам калык лӱм дене палемдалтше «Шырча» фольклор ансамбль сылне да мыскара шотан мурылаже дене мучашлыш.
Варажым кажныже посна классыште мастер-классым эртарышна. Республикнан лӱмжым нумалше да курым утла шочмо йылмына дене савыкталтше «Марий Эл» газетна, тудын историйже, тыгак редакцийыштына тыршыше моло специалист-влакын пашашт нерген Михаил Скобелев дене радамын каласкалышна. Йоча-влаклан шкенан да ойырен налме профессийна нерген пален налашышт оҥай ыле.
– Тугеже те кажне кечын сочиненийым возеда, – тӱшкаште шоктыш йӱк.
«Ончыко» журнал вуйлатыше Игорь Поповын икшыве-влакым почеламутым возаш туныктымо мастер-классшат пайдале лийын. Тудын палемдымыж почеш, сылнымут корнылам йоча-влак марла сайынрак возат.
Кечывал деч вара туныктышо-влакын командышт дене волейболла модна. Мемнан командышкына Иван Михайловичат кумылын ушныш. 70 ийыш тошкалше поро йолташнат, самырык жапшым шарналтен, мечым перкалыш.
Тыгай вашлиймаш республикысе газет ден журналлаште тыршыше-влакланат, школышто пашам ыштыше да тунемше-шамычланат, кумдан палыме сӱретчыланат моткоч пайдале. Тыге ме, икте-весе дене вашлийын, пашана дене палдарена, чоннам почына да кылнам пеҥгыдемдена. А кызытсе саманыште тидыже моткоч кӱлешан.
Алевтина БАЙКОВА
Авторын да М.Скобелевын фотошт
