Марий Эл правительствын черетан совещанийыштыже регионым вуйлатыше Александр Евстифеев «Здравоохранений» национальный проектым илышыш пуртымо кышкарыште шындыме задаче-влакын шукталтме радамыштым рашемден да поснак кугу тӱткышым кундемыштына коронавирус шарлыме деч тӱрлӧ мероприятийым ямдылыме йодышлан ойырен.
Тазалыкым аралыме министр Марина Панькован мутшо почеш, таче регионыштына палемдыме профиль дене кандаш инфекционный стационар медицине полышым пуа. Тушто 246 койко уло. Коронавирусын инфекцийже чот шарлыме годым тыгай койкын чотшым угыч профилироватлыме йӧн дене 850 марте ешараш палемдыме. Ик гана пайдаланыме маскым, перчаткым, халатым, тыгак дезинфицироватлыше средствам, реанимаций оборудованийым, эмым ямдылыме. Кызытеш коронавирус дене черланен кертше пациентым инфекционный отделенийыш кондаш келшыше носилке гына уке.
А.Евстифеев Марий Эл правительствын резерв фондшо гыч Минздравлан 900 тӱжем теҥгем ойыраш да носилкым лишыл жапыште налаш кӱштен.
Роспотребнадзорын Марий Элысе виктемжым вуйлатыше Светлана Булатова вирусым регионыш пуртымо да шаркалыме деч эртарыме мероприятий-влак дене палдарен. Тудын мутшо почеш, калык поснак шуко улман верлаште жапын-жапын дезинфекций ышталтеш. Таче кечылан Марий Элыште чек вес веч толшо 15 еҥын тазалыкшым тергат.
Транспорт да корно озанлык министрын обязанностьшым шуктышо Александр Желонкин коронавирус деч профилактике шотан мероприятий-влакын аэропортышто да вокзаллаште эртаралтме радамышт дене палдарен. Кызыт медицине пунктлашке кӱлешан оборудований ден средствам ситарат, мутлан, аэровокзалыш инфракрасный манме термометрым, маскым, перчаткым, салфеткым, дезинфицироватлыме гельым налын шапашлыме, увертарыме схемым уэмдыме, персоналлан инструкцийым эртарыме.
«Ик гана чийыме костюмым кызытак шапашлаш кӱлеш. Тыгай азап мемнан деке толын огеш шу манын ӱшанена гынат, те садак ямде лийшаш, чыланат ик команде семын пашам ыштышаш улыда», – палемден республикым вуйлатыше.
Тылеч вара «Здравоохранений» национальный проектым илышыш пуртымо йодышым лончыленыт. Тудын дене келшышын, Волжск оласе рӱдӧ больницылан «Первичный медико-санитарный полышым пуымо системым вияҥдымаш» федеральный проект почеш цифровой флюорографан да рентген маммографий цифровой аппаратан куснылшо медицине комплексым налме, тидлан 16 млн. 800 тӱжем теҥгем кучылтмо.
Тиде больницынак йоча поликлиникыжым тӱрыснек олмыктымо да палаш лийдымын уэмдыме. Ынде тудо кызытсе жаплан келшыше чапле йочасадым ушештара. Медперсонал «перегыше производство» технологийын принципше почеш пашам ышта. «Марий Элыште йоча здравоохраненийым вияҥдыме программе» региональный проектым илышыш пуртымо кышкарыште тидлан республикын бюджетше гыч 3 млн. наре теҥгем ойырымо.
М.Панькован каласкалымыж гыч, изи пациент-влаклан да нунын ача-аваштлан поликлиникыште палынак йӧнан лийын. Кумдыкым функционалым шотыш налын шеледыме, медицине тӧнежыш толшо-влак дене администратор пашам ышта, почмо регистратур специалист-влак деке логалме корным куштылемда.
Тылеч посна пытартыш кок ийыште кызытсе жаплан келшыше кӱкшӧ технологиян оборудованийым налашлан федеральный да региональный бюджетла гыч 20 млн. теҥгем ойырымо, тыгак рентген диагностике цифровой аппаратым, ультрайӱкан стационар да ультрайӱкан портативный сканерым, лор-комбайн ден риноларингофиброскопым, 12 каналан портативный электрокардиографым налме.
Поликлинике 16 тӱжем наре йочам обслуживатла. Таче кечылан специалист-влакын штатышт тичмаш огыл, но тиде йодыш решатлалтеш.
Республикым вуйлатыше «перегыше производство» технологийым моло медицине тӧнежышкат шыҥдараш темлен.
Марий Эл Республикым
вуйлатышын организаций да
аналитике виктемжын уверже
негызеш М.ИВАНОВА ямдылен
