Марий Элым вуйлатыше Юрий Зайцев ден Россий Федерацийын сенаторжо Сергей Мартынов граждан-влаклан приёмым эртареныт.
Регионым вуйлатыше палемден: тыгай вашлиймаш верлаште ик эн пӱсӧ йодышым рашемдаш моточ кӱлешан. Мутлан, Килемар район Нежнур селаште илыше ӱдырамаш верысе тӱвыра пӧртым олмыктымо шотышто мутым тарватен. Марий Эл правительстве председательын алмаштышыже – Тӱвыра, савыктыш да калык паша шотышто министр Константин Ивановын умылтарымыж почеш, Нежнур селасе Тӱвыра пӧрт «Еш поянлык да тӱвыра инфраструктур» федеральный проектысе «Еш» у национальный проектыш пурталтын. Республикын правительствыже тудым 2025 ийлан ик эн кӱлешан объект-влак радамыш пурташ решенийым луктын. Тӱвыра пӧртым олмыкташ Россий Федерацийын да Марий Элын бюджелаж гыч 12,5 миллион теҥгем ойыраш палемдыме.
Шернур посёлко гыч приёмыш толшо ик еҥ шукерте огыл демобилизоватлалтын, кызыт тренерлан пашам ышта. Тудо универсальный спортплощадкын оборудованийжым уэмдаш, тыге йоча ден кугыеҥ-влаклан тушто идалыкын кеч-могай пагытыштыже физкультур да спорт дене заниматлаш йӧным ышташ йодаш толын. Регионым вуйлатышын палемдымыж почеш, боецын йодмашыже шукталтеш. Пытартыш ийлаште республикын правительствыже кундемыштына спорт инфраструктурым вияҥдымылан кугу пашам ыштен. Республикна мучко 40 объектым чоҥымо: тиде физкультур-тазалыкым пеҥгыдемдыме комплекс, «ушан» спортплощадке, хоккей дене модаш вер-влак да молат.
Нолько посёлко гыч толшо верысе рӱдӧ корнышто лӱдыкшӧ кумдыкым олмыкташ йодаш. Марий Элым вуйлатыше тиде объектым шушаш ий август марте шотыш кондаш палемден.
«Единая Россия» партий председатель Д.Медведевын регионысо общественный приёмныйыштыжо еҥ-влак дене вашлийме деч посна Юрий Зайцев ден Сергей Мартынов школышто специальный военный операцийыште улшо-влаклан окоп сортам ыштыше йоча-шамыч дене вашлийыныт. Марий Элым вуйлатыше палемден: боец-влаклан нунын полышышт моткочак кӱлеш, а окоп сорта мӧҥгыштым шарныкта да чоныштым эшеат ырыкта. Сенатор ӱдыр-рвезе-влаклан фронтлан полшымыштлан тауштен да каласен: нунын серышышт, шке кид дене ыштыме сорташт салтак-шамычлан тушманым сеҥаш вийым пуа.
Марий Эл Республикым вуйлатышын пресс-службыжын уверже негызеш Г.Кожевникова ямдылен
