Параньга районысо Матародо селаште верланыше «Сказка» йочсад «Российысе 100 эн сай дошкольный учреждений» конкурсышто сеҥышыш лектын.
Тудым кодшо ийысе 1 ноябрь гыч тенийсе март марте РФ-н Качестве да инноваций межрегиональный рӱдерже эртарен. Участник-влак шкеныштын учрежденийышт нерген почмо публичный интернет-ончер гоч палдареныт. Чылаже конкурсыш Российысе 48791 образовательный учреждений ушнен.
Конкурсант-влакым тӱрлӧ шӧрын гыч акленыт: йоча-влакын тазалыкыштым пеҥгыдемдыме, уш-акылыштым пойдарыме, творческий мастарлыкыштым вияҥдыме, художественно-эстетический, социально- личностный качествевлакым куштымо шотышто могай сеҥымаш-влак улыт. Тыгак ончерым ойыртемалтшын сылнештарымымат шотыш налыныт. Участник-влакын пашаштым апрельыште почмо йӱклымаш гоч акленыт. Сандене Параньга районысо образований сферыште ыштыше-влак шке коллегыштлан утларак йӱкым погаш полшеныт.
А сентябрьыште йочасадым всероссийский конкурсын лауреатше семын палемденыт да грамот ден медаль дене пырля «2020 ийлан йочасад-влаклан ямдылыме дистанционный технологийлан программный комплектлан» сертификатым кучыктеныт.
С.НОСОВА
