АКЦИЙ КОНКУРСЫ

Вашке мотор вургеман лийыт

Марий Турек районысо калыкым социально обслуживатлыме комплексный рӱдер Чуваш Республикысе «Лукойл» ПАО-н увертарыме социальный да культурный проект-влак конкурсыштыжо сеҥышыш лектын.
Конкурсышто 59 проект участвоватлен. Сеҥышыш Россий Федерацийын 6 регионжо гыч 27 социальный да культурный проект лектын.
Марий Турек районысо калыкым социально обслуживатлыме комплексный рӱдер конкурсыш «Чонна дене самырык улына» проектше дене ушнен. Тудын тӱҥ шонымашыже 16 пенсионерым ушышо «Гармоний» куштышо коллективлан руш калык костюмым ургымо да «Весела совлазе-влак» кружоклан семӱзгарым налме дене кылдалтын. Грантын суммыжо 102 тӱжем теҥге.
2016 ийыште рӱдерыште Ший ийготын школжым почмо. Тудо чолга да вургыжшо шӱм-чонан шагал огыл пенсионерым иквереш ушен. Тысе «Тазалык да кужу ӱмыр», «Лӱдыкшыдымӧ илыш», «Компьютер грамот», «Сурт сомылка» да моло факультетлаште илалше еҥ-влак шуко пайдале увер дене палыме лийыт. Скандинав йӧн дене коштмо «Тонус» клубымат чумырымо… Но пенсионер-шамычлан эше кушташ, мураш, модаш кӱлын, да 2019 ийыште «Гармоний» ден «Весела совлазе-влак» кружок-влакым почмо.
Проект полшымо дене артист-влак шӱм-чоным тарватыше выступленийышт дене веле огыл, ынде мотор костюмышт денат куандараш тӱҥалыт.

М.ИВАНОВА

Опубликовать в Одноклассники

Добавить комментарий