УВЕР ЙОГЫН

Республикын правительствыштыже: Сай велыш вашталтышым палемденыт

13 февральыште Россий Президентын Юл кундем федерал округышто полномочный представительже Михаил Бабич Марий Элыш паша дене толмыж годым регионын бюджетшым тӧрештарыме,  кугыжаныш финансшым тазаҥдыме да социально-экономически вияҥме шотышто мерым илышыш шыҥдарыме йодыш-влак дене кылдалтше совещаний-влакым эртарен. 

Мероприятийлаште Марий Эл вуйлатыше Александр Евстифеев, Россий Федерацийын финанс министржын алмаштышыже Леонид Горнин, тыгак  федеральный да и регионысо исполнительный кучем орган-влакын вуйлатышышт лийыныт.

Совещанийым почмыж годым Михаил Бабич палемден: республиклан федерал бюджет гыч кугу полыш пуалтеш: 2015-2017 ийлаште 27,4 млрд. теҥге (тышеч дотаций – 17,2 млрд. теҥге, бюджет кредит-влак – 10,2 млрд. теҥге) ойыралтын. Регион шкежат бюджетын доход ужашыжым кугемдаш тырша, ойлен Михаил Бабич. Тудо Марий Эл вуйлатыше Александр Евстифеевын да республикын правительствыжын регионышто окса йодышым стабилизироватлыме шотышто ыштыме пашаштым кӱкшын аклен. Кучемын тыршымыж дене республикын кугыжаныш парымже 2017 ийыште ятырлан иземын да округышто ик эн сай кӱкшытыш шуын.  

Официальный мероприятий-влак мучашлалтмеке, кастене (йӱдым манашат келшен толеш, вет жап 21 шагатат пеле ыле) журналист-влак дене вашлиймаш лие. Икмыняр йодышлан Михаил Бабич ден Александр Евстифеев вашештышт. Полномочный представитель палемдыш:

— Мый шуко ий жапыште икымше гана Марий Эл Республикын правительствыжын федерал правительстве дене улшо кылжылан куанем. Россий финанс министрын алмаштышыже Леонид Горнинат ойлымаштыже каласыш, мыят таче ик гана веле огыл палемдышым: 2017 ийыште республикыште кугыжаныш парым кугеммым сеҥен веле огыл кертыныт, тыгак «шылтыме» 3 миллиард теҥге парымым муын луктыныт да регионын ончычсо вуйлатышыжын ыштыме парымжым тӱлаш обязанностьым шке ӱмбакышт налыныт. Республикын бюджетшылан 3 миллиард теҥге – тиде моткочак кугу окса. Туге гынат кызыт чылажымат бюджетыште шотыш налме. Российын Финанс министерствыжат, правительствыжат лийше 106 процент кугыжаныш парымым 81 процент марте волтен кертмым палемдат. 2018-2020 ийлан чын бюджет ышталтын. Оксам кушко да молан кучылтшашым раш умылат: эн ончычак социальный обязательствым шуктыман. Россий Президентын майысе указше, еҥ-влак ончылно улшо чыла обязательстве ончыкыжымат шукталтытеш. Тидлан таче «илыше окса» палемдалтын. Тудым ме бюджетыште ужына. Кӱчык жапыште ышталтше паша шке лектышыжым пуэн. 2018 ийлан регионлан пуымо бюджет полыш кугемдалтын. Тиде кӱкшыт ончыкыжымат кушкаш тӱҥалеш. Оксам палемдыме паша деч ӧрдыжкӧ кучылтмаш уке. Тиде тӱҥ шотышто республик вуйлатышын да правительствын сеҥымашышт.

Александр Евстифеев палемдыш: республикын кучемжын эн ончыч шуктышаш пашаже – социальный политике.

— Лу тылзе ончыч ме моткоч кугу нелылыкан экономикым «налынна». Таче тудо «таза» манынак каласен огына керт. Президентын полномочный представительжын, президентын аппаратшын, администрацийжын Марий Эл Республикын бюджетше да оксаже шотышто пашашке ушнымыштлан тауштена. Мый каласен кертам: элын президентшын резерв фондшо гыч оксам налаш ме йодмашым пуэнна. Тиде оксам, 202 миллион теҥгем, налынна. Кугурак ужашыжым кучылтынат шуктенна. Молыж дене паша ышталтеш. Шотлышо палате мыланна предписанийым пуэн. Нуным шуктенна. Республикын правительствыже шотышто замечаний уке, — каласен Марий Эл вуйлатыше Александр Евстифеев.

Михаил Бабичын ойлымыж почеш, регионын мер-политике да социально-экономический вияҥмашыжлан пӧлеклалтше совещанийыште Россий Федерацийын Президентшым сайлымашлан ямдылалтме да тудым эртарыме, тыгак лӱдыкшыдымылык дене кылдалтше йодыш-влакым каҥашыме. Сайлымаш демократий шӱлышеш, законодательстве дене келшышын эртыже манын, совещанийыште икмыняр посна задаче шындалтын.

Любовь Камалетдинова.
М.Скобелевын фотожо.

Опубликовать в Одноклассники

Добавить комментарий