Кеҥеж каныш жапыште Ийготыш шудымо-влаклан «Журавушка» социально-реабилитационный рӱдерыште Марий кугыжаныш университетын «Воскресение» отрядшын боецше-влак Марий Эл да Запорожье область, ДНР гыч йоча-шамычлан патриотизм шӱлышан мероприятий-влак циклым эртареныт.
Тыгай мероприятий республикыштына Россий Федераций президент Владимир Путинын кӱштымашыже почеш илышыш пурталтше «Без срока давности» научно-просветительский проект кышкарыште эрта.
Студент-влак 1941-1945 ийласе Кугу Отечественный сарлан пӧлеклалтше ончерым чумыреныт, тыгак оккупироватлыме кундемлаште нацист-влакын шучко пашашт, тыныс калыкым орландарен пуштедымышт, партизан толкынын участникше-шамыч, совет калыкын подвигше нерген кумдан каласкаленыт. Экспозиций дене кеҥеж жапыште чылаже 1500 ӱдыр-рвезе палыме лийын, тидын деч посна нуно отрядын боецше-влак дене мутланен да йодыштын кертыныт.
6 августышто «Воскресение» мероприятий циклжым мучашлыше патриотизм кечым эртарен. Ты вашлиймаште йоча-шамычлан «Благодарю за службу. История заключённых, служивших нацизму» фильмым ончыктеныт. А тудын негызшылан Марий Элыште Россий УФБС-ын шолыпышто кучымо материалжым налме. Тушто Кугу Отечественный сарыште лийше событий, нацисткий Германийын войскаже-шамычын преступленийышт, СССР-ын нацизм ваштареш кучедалмаште тӱҥ рольжо нерген чын сведений-влак улыт.
Патриотизм кечын рӱдерыште тазалыкым пеҥгыдемдыше ӱдыр-рвезе-влак дене Марий кугыжаныш университетын ректоржо, «Знание» Россий обществын регионысо пӧлкажын председательже Михаил Швецов вашлийын. Вашлиймаш годым историйым фальсифицироватлыме, Украиныште специальный военный операцийым эртарыме кышкарыште неонацизм ваштареш кучедалмаште кугыжанышнан рольжо дене кылдалтше йодышлам тарватеныт.
Патриотизм шӱлышан тыгай мероприятий республикыштына чӱчкыдын эртаралтыт да нуно самырык тукымлан чын воспитанийым да образованийым пуымашке виктаралтыныт.
Г.Кожевникова
