20 апрельыште Э.Сапаев лӱмеш опер да балет академичесий театрыште Балетын артистше ден хореографше-влакын всероссийский конкурсышт почылтын.
Тений тушко Российын индеш регионжо гыч латкуд хореограф ушнен, вет ты гана лач нунын мастарлыкыштым жюри аклаш тӱҥалеш.
– Идалык жап моткоч писын эртен кайыш. «Росконцерт» ден Россий культур министерствын ты фестивальым Йошкар Олаште эртараш ойырен налмыштлан моткоч куаненна ыле. Конкурс кугу кӱкшытыштӧ эртыже манын, ме чылан тыршенна, сандене мӱндыр уна-влакын толмекышт «ме пуйто мӧҥгыштына улына» манын каласымыштым эн кугу ак семын шотлена. Республикыштына балет искусствым пагалыше да аклыше-влак илат. Тидым ме зал тич погынышо калыкым шотыш налын, пеҥгыдын каласен кертына, – журналитст-влак дене вашлиймаште палемден республикын тӱвыра, савыктыш да калык-влакын пашашт шотышто министрже Константин Иванов.
Тений икымше гана фестивальыш Моско оласе К.С.Станиславский да Вл.И.Немирович-Данченко лӱмеш академический музыкальный театр ушнен.
– Театрна тӱнямбалне чылалан палыме, садене ме регионлашкат лекшаш улына. Лач тидыже мемнан пашаштына ик эн тӱҥлан шотлалтеш. Ме ик ганат лийдыме верыш лекшаш улына. Ты гана Марий Элыш толынна. Тыште мыланна чыла келша, калык дене мутланыме, олам утларак пален налме дене кумылна эшеат нӧлталтеш. Йошкар-Ола – мотор ола, тыште илыше-влакын театр искусствым йӧратымышт да тудым вияҥдымашке республикысе кучем могырымат кугу тӱткыш ойырымо палынак шижалтеш. Моско театрын марий сценыште мастарлыкым ончыктымыжо тысе зритель ден артист-влаклан эшеат вийым ешара да ончыкшымат тыршен пашам ышташ кумылаҥда шонем, – каласен Моско театрын генеральный директоржо Андрей Борисов.
– Ме эреак уым кычалына, у лӱмым калыкыш лукташ, у куштымаш йылмым «почаш» шонена. Лач тыгай пашамак шукта тиде конкурсат, – ешарен Моско театрын балет труппыжын художественный вуйлатышыже Максим Севагин.
Ты коллектив ик актан кум балет дене «Блум/Четыре/Маленькая смерть» мероприятийым почын. Тудым пайремлын почмаште Марий Эл вуйлатыше Юрий Зайцев лийын.
Регион вуйлатыше Йошкар-Олаштына кокымшо гана эртаралтше всероссийский конкурсын участникше ден унаже-влакым саламлен да тыгерак каласен: «Марий Элыште театр искусство вияҥеш, чапле фестиваль, кугу гастроль да усталык таҥасымаш-влак эртаралтыт».
– Балетын артистше ден хореографше-влакын всероссийский конкурсышт ончыч элыштына Балетын артистше ден балетмейстерже-влакын всесоюзный конкурсыштым эртарен шогымо йӱлам умбакыже шуйышаш, – палемден Юрий Зайцев. – Конкурс тиде – таҥасымаш огыл, тудо кажне участниклан шкемым да ойыртемалтше стильым ончыкташ йӧным пуа. Тыгай мастарлык у шонымашым шочыкташ да балет искусствын у шӧрынжым почаш кумылаҥда.
Конкурс 26 апрельыште иктешлалтеш. Тиде жапыште усталык лабораторий, вашлиймаш, мастер-класс, лекций-влак эртаралтыт.
Мероприятийыш толшо-влаклан театрын кокымшо пачашысе фойештыже фотограф, поэт Виталий Татариновичын (Санкт-Петербург) «Ускользающая романтика танца» фотовыставкыже пеш оҥай. Тушко фотограф ӱмаште тыгаяк конкурс эртыме жапыште ыштыме 20 тӱжем кадр гыч ойырен налме 25 пашажым ончаш да аклаш луктын. Кажныштыже тудо куштымаш искусствын моторлыкшым, ойыртемжым, ямжым ончыкташ тыршен.
А.БАЙКОВА
