Кажне ийын республикысе образований системын самырык туныктышыжо да воспитательже-влаклан «Педагогический дебют» профессионал мастарлык конкурс эртаралтеш. Тений тудын пытартыш этапше Йошкар-Оласе 29-ше №-ан школышто да 76-шо №-ан «Солнышко» йочасадыште 15 ноябрьыште лийын. Тушто усталыкым чылаже 34 туныктышо да воспитатель ончыктен.
Сеҥышыш лектыныт:
«Самырык туныктышо-влак» номинацийыште – Советский районысо Солнечный кыдалаш школышто историйым да обществознанийым туныктышо Александра Трухина;
«Дошкольный образовательный организацийын самырык воспитательже» номинацийыште – Звенигово оласе «Светлячок» йочасадын воспитательже Анна Архипова;
«Педагог-наставник» номинацийыште – Волжск оласе 5-ше №-ан кыдалаш школын завучшо, руш йылмым да литературым туныктышо Надежда Полякова.
Каласыман, финалыште кажне участник Шарнымаш да чап идалыклан пӧлеклалтше образовательный проектше дене палдарен, йоча-влак дене занятийым эртарен да кызытсе образований системыште вшлиялтше ик эн пӱсӧ йодыш-влакым каҥашымаште шонымашыжым ойлен.
Конкурсышто сеҥыше-влакым саламлыме годым Марий Эл Правительстве председательын икымше алмаштышыже М.Васютин нунылан дипломым да шарнымашан статуэткым кучыктен. «Рвезылык – тиде ончыкылык, профессионал да личность семын вияҥын кушкаш йӧным пуышо жап», – каласен тудо.
Марий Эл образований да науко министрын алмаштышыже Н.Антоничева педагог-наставник-влакын пашаштым моткоч кӱлешан семын палемден ойлен: «Нуно шке шулдырышт йымаке самырык-влакым налыт да ончыкылык профессионалым куштат, мастарлыкыштым ончыктат»,
Г.КОЖЕВНИКОВА.
М.Скобелевын фотожо.