16 сентябрьыште Йошкар-Олаште «Наций-влакын кроссышт-2017» Марий Элыште тӱшка тӱҥ стартыш вичшӱдӧ наре участник лектын.
Тиде таза илыш-йӱлан ик эн ӱшанле йолташышт-шамыч лийыныт. Мотор шыже игече, сандене шукышт садыште, пакчаште тыршеныт але, корзиҥгам налын, чодырашке вашкеныт.
Молгунамсе семынак старт 12 шагатлан пуалте. 2017 метр кужытым спорт министрын пашажым жаплан шуктышо И.Гребнев, Йошкар-Ола администрацийыште физкультур да спортлан вуйын шогышо С.Мухортов куржын эртеныт. А теве МарГУ-н ректоржо М.Швецов 8 километрым шеҥгеланже коден.
Ийготым шотыш налын, ты гана чылаже 30 призёрым палемденыт. Участник-влак коклаште куштылго атлетике дене тӱнямбал кӱкшытан спорт мастер Л.Лебедеват лийын. «Изиш мардеж шижалте. Такшым чылажат сай ыле», – мане Людмила.
Эн изи семын коляскыште кийыше кок тылзаш Лиза лийын гын (аваже А.Зотова финишыш коляске дене шӱкен пурен), эн опытан семын ончыч сутка мучко, кызыт марафоным куржталше Н.Соколовым палемдыман.
– Чевер шыже игече чодырашке ӱжеш. Туштыжо таче поҥгым погышо куржталше деч шукырак, векат. Тыштат-туштат – пайдале каныш, – шыргыжал пелештат участник-влак кокла гыч южышт.
Тыгак верысе районлаштат ты спорт пайрем сай кӱкшытыштӧ эртен. Мутлан, Волжский районышто «Наций-влакын кроссышт-2017» Памар селаште лийын.
– Стартыш чылаже 220 еҥ лектын. Коло тӱшкалан ойырен, Чап грамотым кучыктымо, – ойла районысо физкультур ден спортлан вуйын шогышо А.Михайлов. – Эн изи семын кок еҥлан: кок ияш Степан Степанов ден Иван Бодняевлан шарнымашан пӧлекым кучыктымо. Эн опытан семын Анатолий Спиридонов (68 ий) ончыко лектын. Абсолютный чемпион – Пӧтъял кыдалаш школ гыч Д.Аканаев. Ойыртемалтше семын Якимовмыт ешым палемдыме. Вич еҥ куржын.
Кужэҥер посёлкышто таҥасыше-влак коклаште Коҥганур школын тунемшыже-влак эн тале семын лийыныт.
Е.Эшкинина.
