«Виктория» олимпийский резерв спорт школлан тений икымше гана оборудований ден тренажер-влакым налаш субсидийым пуат. «2016-2020 ийлан Россий Федерацийыште физический культур ден спортым вияҥдымаш» федеральный целевой ден «Марий Элыште физический культур ден спортым вияҥдымаш» республикын кугыжаныш программ-влак почеш ты школ миллион теҥгем налеш.
Субсидийын икымше ужашыжым общий физический ямдылалтмашлан (тиде тренажёр дене спортын чыла видше дене кылым кучышо-влак пайдаланен кертыт) пуат гын, вес пелыже специальный физически ямдылалтмашлан, ече спортлан ойыралтеш. Таче кечылан пале: «Виктория» спорт школ SkiErg тренажёрым налеш. Тудо организмым аэробный нелыт дене пойдара. Тыгак ты школ «Тележка» MASTER-SKI ече тренажёран лиеш. Тудыжо ечызе-влаклан вий-куатым, чытымашым, техникым вияҥдаш полша.
Ечызе, биатлонист, тыгак двоеборье да ече ориентирований дене кылым кучышо спортсмен-шамычлан Ercolina у модель тренажерым налыт. Марий Элын Молодёжный политике, спорт да туризм министерствыжын пресс-службыжын палемдымыж почеш, у оборудований спортсмен-влаклан региональный, Россий, тӱнямбал первенстве ден чемпионатлаште вийыштым тергаш, сайрак результатым ончыкташ йӧным ышта.
Палаш оҥай: тыгай субсидийым спортын базовый видше дене ямдылыше спорт школ да олимпийский резерв училище-влак гына налын кертыт.
Е.Эшкинина.
