Еменгулов
СПОРТ

Ӱшан ок йом, сеҥымаш куандара

Вячеслав Степанович Еменгулов 1985 ий гыч ече дене Кужэҥер районысо ДЮСШ-ште старший тренер-преподаватель сомылым шукта. Жапын-жапын Коҥганур школышто физкультур урокымат вӱден. Но чӱчкыдынак сборыш, таҥасымашке лекмылан кӧра физкультурым эртараш жап ситен огыл. Паша ыштыме жапыште Вячеслав Степановичын ятыр воспитанникше физический культур да спорт сферыште пашам ышташ кумылаҥын. Нунын коклаште икмынярышт кугу спортыш корным ойыреныт. Мутлан, шукыштлан палыме  тӱнямбал кӱкшытан спорт мастер Алевтина Таныгина. Тудо икмыняр гана элнан сборныйжын членже, Сочиште эртыше теле Олимпиадышкат кандидат лийын. Тыгак куштылго атлетике дене спорт мастер Евгений Быковым палемдыман. Кызыт школышто физкультур урокым вӱда.

Таче кечын Коҥганур школышто тунемше, кызыт Москошто шинчымашым погышо  Костя Павлов кугу ӱшаным пуа. Шукерте огыл Спартакиадыште вийым тергымыж годым спорт мастер нормативым шукташ рвезылан кок секунд ситен огыл.

– Самырык-влак коклаштат ече спортышто ӱшаным пуышо улыт. Тиде –  Григорий Полушин, Кристина Бочарова, Антон Хлыбов, У Торъял гыч ты школыш тунемаш толшо-влак Кирилл Сидоркин ден Андрей Шестаков. Спортсмен-шамыч тыршыше, пашам йӧратыше улыт, – ойла Вячеслав Степанович.

Такшым тренер воспитанникше-влаклан чыла шотыштат пример лийшаш. Лач тидым ойлаш лиеш В.Еменгулов нерген. Жапше годым тудо шкежат тале спортсмен семын аклалтын. Сайын куржталын, ече денат результатше ойыртемалтше лийын. Спортын тӱрлӧ сферыштыже вийжым терген. Кирам нӧлтымӧ дене спорт мастер нормативым шуктен. Тидыж дене тудын посна историй лийын. Армийыште служитлымыж годым Вячеслав 24 килограмм нелытан кирам 90 гана нӧлталын. Ече дене – спорт мастерыш кандидат. Таче кечылан – РФ физический культурын да спортын отличникше.

Тренерым ончен, ой-каҥашыжым колыштын, ӱдыр-рвезе-влак, чынжымак, тудын гай лияш тыршат, сай кӱкшытыш шуыт. Вячеслав Степановичлан кажныже шке икшывыж гаяк улыт. Кажныштын койыш-шоктышыжым, кумылжым умылаш тырша, полша. Кажне таҥасымаш годым шке воспитанник верч мыняр тургыжланымаш!  

Ече тудын пӱтынь илышыже манашат лиеш. Пӱртӱсын кеч-могай пагытыштыже – эреак йоча-влак коклаште. Кажне таҥасымашлан тыршен ямдылалтыт, сборышкат лекташ йӧным муыт. Теве кодшо кеҥежым В.Еменгулов кум спортсменым Екатеринбургыш сборыш намиен. Тушто нунылан велосипед дене кудалышташат йӧным пуэныт. Варажым шке кундемыште, Волжскышто ямдылалтыныт. Результат – шинчончылно. Тиде нунылан путырак кугу шӱкалтыш лийын. Ече  тургымышто кажныже сай результатым ончыктен. К.Полушин спорт мастерыш кандидат нормативым шуктен.

Снимкыште: В.Еменгулов (шолаште) Г.Полушин, К.Бочарова дене пырля; «Буран» деч посна ечызе-влаклан – нигузе. В.Еменгулов тудым шкеак ачала, шотыш конда.  

Е.Эшкинина.

Опубликовать в Одноклассники