10 августышто республикыштына Физкультурникын кечыжлан пӧлеклалтше шуко спорт мероприятий эртаралтын. Тений физкультур да спорт сферыште пашам ыштыше-влак шкешотан юбилейым, 80 ийым палемденыт.
Ты кечын Йошкар-Оласе «Марий Эл» ий полат воктене спорт мероприятийым торжественно почыныт. Лач туштак физический культур да спортын отличникшым, РФ-ын спорт мастерже-влакым палемденыт. Тыгак Инвалид-влакын III всероссийский кеҥеж спартакиадын организаторжо-шамычым саламленыт.
Верысе калык спорт школ-влакын выставкыштым онченыт.
– Ты кечым эреак палемдаш тыршена, – манеш ече дене тренер Е.Рыбаков. – Ечызе-влаклан канаш жап уке, кеҥежымат, телымат я тренировкышто, я таҥасымаште. 11 августышто ече-роллер дене йӱлаш пурышо таҥасымаш лийын. Тушко пошкудо регионла гычат спортсмен-влак толыныт.
– Пайрем конешне. Чыла физкультурник-влакым (80 ий, а куштылго атлетике дене чемпионатым эртарымылан – 100 ий) шокшын саламлем, тазалыкым тыланем. Ончыч таҥасымашлаште, поснак пелемарафонышто вием тергем ыле, а тений ямдылалтын омыл, сандене стартыш шым лек. Икана триатлонышто призёр радамыш логалынам, – ойла ече дене, полиатлон да теле полиатлон дене спорт мастер Е.Рыбаков.
Мўгыралтын Какшан сер воктене…
Торжественный ужаш деч вара Йошкар-Оласе «Марий Эл» ий полат воктене экстрим-мотошоу лийын.
Ончаш толшо-влак Озаҥ ола гыч «BKe Sturn Show» командын выступленийжым онченыт. Командым капитанже Григорий Марков сайын ямдылен. Мутат уке, эн изи участникын (4 ият пелаш рвезын) шоужо шукыштлан оҥай лийын. Тушто мотоцикл, квадроцикл да моло тӱрлӧ спорт технике коклаште шарнымашеш войзалташат йӧн лийын.
А «Дружбышто»…
«Дружба» стадионыштат оҥай мероприятий-влак эртеныт. Тушто шахмат дене модаш йӧратыше-влак таҥасымашке ушненыт, уш-акылым пудыратылыныт. «Нарынче мече» всероссийский уремысе баскетбол таҥасымаш лач тыштак лийын. Тений ты турнирыш регионнан тӱрлӧ кундемже гыч 50 наре команде ушнен.
Спорт пайрем футболист-шамычын Марий Элын кубокшо верч таҥасымашышт дене иктешлалтын. Ты гана Йошкар-Ола гыч «УОР-СШОР» ден «ЗПП» команде-влак вашлийыныт. Икымшыже 5:1 счёт дене сеҥен, Марий Эл кубокын озаже лийын.
«Й» букван озаже-влак
Йӱлаш пурышо пелемарафонышкат тений куштылго атлетикым йӧратыше ятыр еҥ (180) ушнен.
Организаторжо-влак: Йошкар-Ола администрацийын физический культур, спорт да молодёжный политикын управленийже, республикысе шымлыше-консалтинговый рӱдер да куржталаш йӧратыше-влакын «Айвика» клубышт.
Участник-влаклан старт Чарла кремль воктене (Вознесенский урем, 58) пуалтын. Кумылан-влаклан пелемарафон деч посна (21,1 километр) 10 да 5 километрыш куржаш йӧн лийын. Тыгак кумылан-влак 800 метрыш «Царевококшайская полумиля» стартыш лектыныт. Тений тушто вийым тергашлан элнан 20 регионжо гыч 600 еҥ йодмашым возен. Таҥасымашке мӱндыр Мурманск, Хабаровск, Симферополь да моло ола гыч толыныт.
Ойыртемжат шуко лийын. Нунын кокла гыч иктыже – тений пелемарафонын да «Царевококшайский полумиля» забегын участникше-влаклан шкешотан, «Й» буква форман медальым кучыктеныт.
Пелемарафонын абсолютный сеҥышыже – Йошкар-Ола гыч 28 ияш Вячеслав Васильев. Кокымшо верым (2 секундлан почеш кодын) Шернур район гыч Алексей Ахтямов налын гын, кумшо верыш Волжский район гыч Евгений Кириллов лектын.
– Тӱҥалтыште ныл еҥ ончылно куржынна. Икымше верыш лекше деч финиш деч изиш почеш кодым, а вара поктен шуаш нелырак ыле, – ойла пелемарафонышто ӱмашсе чемпион, тений ший призёр А.Ахтямов. – Ме таҥасымашлашке Андрей изам дене коктын эреак лекташ тыршена. Тудо ты гана 12-шо верым налын. Чылаштым олан да Физкультурникын кечыж дене шокшын саламлена, эреак тарванылаш, куржталаш тыланена. Кеч уремлаште, парклаште тыглай ошкылаш єрканаш огыл, шкан жапым муаш тыршыза. Вет тазалык шкенан кидыште. Тудым эскерыман.
Е.ЭШКИНИНА.
Снимкылаште:
Авторын да М.Скобелевын фотошт.
