2 апрельыште Сочиште марафон дене Российын чемпионатше эртен.
Ӱдырамаш-влак коклаште икымше верым землякна (кызыт Москва областьлан куржталеш) Морко район гыч Алина Прокопьева налын. Дистанцийым тудо кок шагатат 32 минутат 38 секундышто эртен. Кокымшо верыште – тале куштылго атлет, Шернур район гыч тўнямбал кўкшытан спорт мастер Людмила Лебедева (2:33.11.).
Пьедесталын кумшо верыштыже Челябинск область гыч Евдокия Букина лийын.
– Тӱҥалтыште ончычсо лидер-шамыч, Марина Ковалёва ден Аня Викулова, пеш талын куржыч. Ме Людмила дене нунын почеш тыршенна. Мый тӱҥалтыш лу километрыштыже чытем манынат шоналтенам. Варажым ӱдыр-влак корно гыч кораҥыныт. А ме шке семынна куржынна. Тунам Российын чемпионкыжо лийын кертам манын шоненам. Кеч икмыняр жап Людмила почеш гына куржынам. А финиш марте пытартыш шым километр деч ончыч ончылтышым. Можыч, тудлан мардеж мешаен. Тидат куштылго атлет-шамычлан могай-гынат чаракым ышта, – палемдыш Алина Прокопьева.
