22 февральыште Россий ФСИН-ын Марий Элысе управленийжын конференц-залыштыже Шочмо элым аралышын кечыжлан пӧлеклалтше пайрем эртен. Ведомствын чыла пашаеҥжым, поснак, мутат уке, пӧръеҥ-шамычым, управлений начальник Сергей Евтушенко саламлен, палдара Марий Элысе УФСИН-ын пресс-службыжо.
УИС вуйлатыше пайрем нерген кӱчыкын ойлен да ойыртемалтше пашаеҥ-влаклан ведомствын наградыжым кучыктен. «Уголовно-исполнительный системым вияҥдымашке надырым пыштымыжлан» медаль дене Аркадий Трофимович Трофимовым палемдымым поснак каласен кодыман, вет тудо — Кугу Отечественный сарын участникше, ведомствын ветеранже-влакын республикысе ушемжын еҥже.
Мероприятийын пытартыш ужашыже эшеат куандарыше лийын. Тунам республикысе уголовно-исполнительный системын ончычсо пашаеҥже-влаклан Сергей Евтушенко кугыжаныш жилищный сертификатым кучыктен. Вич ешлан ойырымо сертификат-влакын окса кугытышт — т8,5 миллион наре теҥге.
Л.Камалетдинова.
А.Канатеевын фотожо.
