19 февральыште В.Васильев лӱмеш Йылмым, сылнымутым да историйым шымлыше марий институтышто «Интернет да IT-ште марий йылмым кучылтмо шотышто лайфхак (пайдале каҥаш)» семинар-практикум лийын. Тудым Марий тӱвыра рӱдер пашаеҥ-влак Геннадий Сабанцев, Андрей Чемышев, Анжелика Митрускова эртареныт.
«Лайфхак» мут англичан йылме гыч пурен. Тудо кок ужаш гыч шога: «life» – илыш да «hack» – пудыртымаш. Но тидым «илыш пудыртымаш» огыл, а «илышым куштылемдымаш» манын умылаш кӱлеш. Шотан лайфхакын ойыртемже тыгай: тудо оксам, жапым да моло ресурсымат аныклаш полша, лекше нелылыкым вес могыр гыч ончалаш йӧным ышта, айдемын шинчымашым налме але пашам ыштыме йӧнжым куштылемда», – каласыш Геннадий Сабанцев.
Марий йылме дене кылдалтше икмыняр каҥаш дене Андрей Чемышев палдарыш. Компьютерыште «Windows», телефонышто «Андроид» системе-влаклан келыштарыме приложений-влакым ончыктыш, Марий мутерым кучылташ туныктыш, чын возымым тергыше программе дене палымым ыштыш.
Марий клавиатурым компьютерышке шындаш «mari-lab.ru» сайтыш пурыман. Телефонлан «SwiftKey» але «Яндекс.Клавиатура» приложенийла келшен толыт. Нуным «Play Маркетыште» муаш лиеш.
Марий мутерым тыгак икмыняр сайт гоч муын кертына. Иктыже – «marlamuter.com». Тушто икмыняр книга гыч кусарымым темлыме. Ты пашаште «Яндекс.Переводчикат» сай полышым пуэн кертеш.
«Мari-lab.ru» сайт нерген кажныже палышаш. Марий клавиатур, электрон книгагудо, йылмым тунемме курс, мутер – мо гына уке. Марла чын возымым тергаш лиймыжак мом шога! Кузе тудын дене пайдаланаш, могай йӧным кучылташ лиеш ты – сайтыште чыла возымо.
Семинарын кокымшо ужашыже кусарымашлан пӧлеклалтын.
«Кок але кум ий ончыч «Марий Эл» газетыште Гельсий Зайниевын кугу статьяже савыкталтын ыле. Тудо статьям марлаш кусарыме сомылым шуктышын ӱстембалне полыш материал семын кучылташ темлем. Ты пашаште тыршыше-влак йылмым але мутым огыл, а шонымашым кусарыман маныт», – палемдыш Геннадий Сабанцев.
Кусарымаште шуко йоҥылыш уло улмаш. Тиде умылыдымашке луктын кертеш. Лектор литератур гыч икмыняр примерым кондыш, марлаш кусарымаште улшо правил-влак дене палдарыш.
Ты семинар офлайн веле огыл, онлайн йӧн денат эртен. Видеом «Марий тӱвыра рӱдерын» Вконтакте воткылысе тӱшкаштыже ончаш лиеш.
О.МОШКИНА
