Март тӱҥалтыште армийыш каяш ямдылалтше рвезе-влак коклаште черетан теле спартакиаде эртен. Тушто латик команде кокла гыч Волжский район икымше верым налын.
Шукынжо Пӧтъял кыдалаш школын тунемшыже лийыныт. Нунын кокла гыч кажныже спорт дене пеҥгыде кылым кучат, физкультурым йӧратат.
– Рвезе-влак пеш молодец улыт. Чынак, Пӧтъял школ гыч Альберт Аркадьевич Семёновын вич воспитанникше лийын: Александр Адреев, Сергей Крючков, Никита Самарский, Максим Уткин, Антон Кувшинов, Сергей Крючков. Ты гана рвезе-влак спортын чыла видыштыже икшырымын таҥасеныт: ны чот ойыртемалтын, ны почеш кодын огытыл. Сайын лӱйылтыныт, кирамат шуко гана нӧлтеныт, турникыште шкем нӧлтымаштат ойыртемалтыныт, ече дене писын куржталыныт. Сандене ончыкыжым эшеат сай результатым ончыктат манын ӱшан уло. Тыге рвезе-влакын опытыштат ешаралтеш, срочный службымат лўдде да куштылгын эрташ тӱҥалыт, – пеҥгыдемдыш Волжский район Сотнур кыдалаш школышто ОБЖ-ым туныктышо О.Иванов.
Палемден кодаш уто огыл: А.Кувшинов ден С.Крючков Россий кӱкшытан президент таҥасымаштат вийыштым тергеныт, Марий Элын чапшым араленыт. «Максим Уткиным поснак мокталтыме шуэш: ече дене сайын куржталеш. Тений район кӱкшытан таҥасымаште ончыко лектын. А Антон ден Сергей пошкудо Татарстан республикыште Олимпийский чемпион Ренат Сафин лӱмеш эртаралтше та‰асымаште призёр радамыш логалыныт, шарнымашан чапле пӧлек дене пӧртылыныт. Кувшинов шке тӱшкаштыже 1-ше лийын гын, Самарский – кокымшо. Кызыт тунемше-влак ГТО нормативым сдатлаш ямдылалтыт», – куан увер дене палдарыш физкультурым туныктышышт А.Семёнов.
Е.ЭШКИНИНА
