СПОРТ

Историйыште икымше гана

Фигурный мунчалтымаш дене тӱнямбал чемпионатыште, тудыжо Стокгольмышто эртен, шкет таҥасымаште ӱдырамаш-влак коклаште пьедесталын чыла верыштыжат Российын спортсменже-влак лийыныт. Чемпионко – Анна Щербакова. Кокымшо верыште – Елизавета Туктамышева, а кумшо – Александра Трусова. Мужыр дене куштымаште  Виктория Синицына ден Никита Кацалапов эн сай семын палемдалтыныт гын, спорт мужыр дене таҥасымаште Анастасия Мишина ден Александр Галлямов эн виян семын ойыртемалтыныт.

Анна Щербакова 2004 ий 28 мартыште Москошто шочын. Спортын ты видше дене кум ияш гычак пеҥгыде кылым куча. Ончыч ачаж ден аваже «Хрустальный» ий полатыш коштыктеныт гын, кызыт тудо «Самбо-70» образований да спорт рӱдерын «Хрустальный» отделенийжылан шотлалтеш. Ӱдыр кум гана Российын чемпионкыжо лийын. Моло дене таҥастарымаште Анна фигурный мунчалтымашын историйыштыже икымше гана ик программыште кок четвертной луцым ыштен. Аваже, Юлия – науко кандидат. Жапше годым Москвасе кугыжаныш университетыште геологлан тунемын, а ачаже, Станислав Щербаков, образованийже дене физик, но рекламе сферыште пашам ышта.

Ойлат, Аннан тукым вожшо Марий Эл гыч тӱҥалеш. Кугезе кочаже, Прохор Васильевич Щербаков, 1914 ий 27 июльышто Медведево район Туршемучаш ялеш шочын. 1971 ий 18 майыште ӱмыр лугыч лийын. Кресаньык ешеш шочын-кушшо рвезе жапше годым комсомол да кугыжаныш вуйлатышылан тыршен. 1937 ийыште Марий ВКСХШ-ым тунем лектын. Ик жап «Рвезе коммунист» газетыште редакций отдел вуйлатышылан ыштен. 1938 ий гыч Морко ВЛКСМ РК секретарь, 1939 ий гыч кокымшо, 1940-1942 ийлаште ВЛКСМ ОК-ын икымше секретарьже.

1942 ий гыч Кужэҥер, а 1943-шо ийыште Оршанке ВКП (б) райкомлаште кокымшо секретарь лийын. 1944 ий гыч Оршанкын, 1945-1948 ийлаште Пектубаевыште РИК председатель. ВКП (б) ЦК пелен высший партийный школым тунем лекмекше, 1951-1959 ийлаште МАССР Верховный Совет Президиумын председательже, 1947-1959 ийлаште МАССР ВС-ын депутатше (кум созыв, 1947-1949 ийлаште Верховный Совет Президиум председательын алмаштышыже), 1946, 1970 ийлаште МАССР Верховный Совет Президиумын Почётан грамотыж, 1946 ийыште Йошкар Шӱдыр, 1951 ийыште (Трудовой Йошкар Знамя) орденла дене палемдалтын.

Анна Щербакован (тренерже Этери Тутберидзе) тӱнямбал кӱкшытыштє вучымо дебютшо теве могай! Оҥай, но кугу спортышто тыгаят лиеш: ончыч ийгот изилан кєра участвоватлен огыл гын, ўмаште пандемийлан кєра чемпионат лийын огыл.

– Мыйым куд минуташ разминке изиш куандарен. Туштыжо мом шонымем ыштен кертынам, йолемымат шижынам. Но пытартыш тӧрштымаш да тидын деч ончычат мыйым спорт мандраж авалтен. Сандене чылажымат эскераш тыршенам, – манын интервьюм пуымыж годым А.Щербакова. Кӱчык программыште 81 балл – личный рекордшо да сеҥымашыже.

Палаш оҥай

Тўнямбал кўкшытан таҥасымашлаште сеҥышыш лекмыштлан спортсмен-влаклан мыняр тӱлат?

Анна Щербаковалан чемпион лӱмым сулен налмыжлан 5 миллион наре теҥгем тўлат. А Е.Туктамышева 3 миллионат пеле наре теҥгелан поя. Бронзо медальын озаже А.Трусовалан 33 тӱжем долларым кучыктат. Тыгак шкетын выступатлыше пӧръеҥ-влак шкет коклаште Россий гыч М.Калида призёр радамыш логалын огыл гынат, 5-ше верым налмыжлан 830 тӱжем теҥгем налеш.

Мужыр дене куштымаште  Виктория Синицына ден Никита Кацалаповлан когылянышт 7 миллион наре теҥгем, тыгак спорт мужыр-влак коклаште Анастасия Мишина ден Александр Галлямовлан тынарак пуат.

Е.ЭШКИНИНА

Опубликовать в Одноклассники

Добавить комментарий