Марий Эл правительстве коммерческий огыл организаций-влаклан физический культурым да тӱшка спортым вияҥдашышт кажне ийын грантым (50 гыч 200 тӱжем теҥге марте) пуаш лийын. Конкурсым тений 26 августышто иктешленыт.
Положений почеш грантым республикын бюджетше гыч ойырат. Конкурсым Самырык-влакын политикышт, спорт да туризм министерстве («Тӱшка спорт» да «Кӱшыл достижениян спорт» направлений дене) эртара.
«Тўшка спорт» направлений дене физкультур да спорт мероприятийым эртараш кўлеш, а «Кӱшыл достижениян спортышто» республикын сборный членже-влак лийшаш улыт. Сеҥен налме грант таҥасымашлаште вийым тергаш, материально-технический базым уэмдаш, сборым, таҥасымашым эртараш, физкультур да спортым пропагандироватлаш кайышаш.
Конкурсым иктешлыме деч вара коммерческий огыл 21 организаций грантым налеш. Нунын коклаште «Тӱшка спорт» направлений дене коммерческий огыл 14 организаций витле тӱжем теҥге гыч полышым налеш.
«Спорт высших достижений» направлений дене коммерческий огыл 7 организацийлан шӱдӧ тӱжем теҥге дене пуат.
Сеҥыше-влакым Молодёжный политике, спорт да туризм министерствын сайтыштыже пален налаш лиеш. Тидлан «Гранты, субсидии» вкладкыш пурыман.
Уста да тале спортсмен-влаклан Марий Элыште тений 200 тӱжем теҥгем ойыреныт. Нунын коклаште паралимпиец-влак: Владислав Макаров ден Дмитрий Масленников. Нуно коктынат сокыр-влак коклаште мини-футбол дене Россий первенствын ший призёржо улыт. Дмитрий Российын спорт мастерже гын, Владислав – спорт мастерыш кандидат.
Эше ик спортсмен – тиде Волжск ола гыч Артём Коровин. Июль тӱҥалтыште Российын спорт мастерже Артём вӱдым куэн кайыме дене (байдарке, каноэ) Европын первенствыштыже Российын командыж дене 500 метр кужытышто ший призёр лийын, ик гана веле огыл элнан первенствыштыже сеҥыше да призёр семын палемдалтын.
Е.ЭШКИНИНА.
