«Марий Эл» газетын пашаеҥже-влак кажне арнян гаяк республикысе районлаш материалым погаш, верысе калык дене вашлияш лектын коштыт. Нине командировкыла гыч шижына: яллаште ола гыч мийыше артист, поэт ден писатель, журналист-влакым эре вучат да кумылын вашлийыт.
Теве кодшо кугарнян редакцийын еҥже-влак Параньга районысо икмыняр илемыште лийыч, варажым Олор школышто вашлиймашым эртарышт. Такшым, ты кечын тушко вес унат, лӱмлӧ мурызо, Марий Элын калык артисткыже Елизавета Коновалова марий телевиденийын пашаеҥже-влак дене пырля мийышаш улмаш. Но ала-могай амал дене нуно толын кертын огытыл. А лӱмлӧ еҥже ты кундем гыч шагалын огыл лектын. Нунын коклаште поэт Еремей Герасимовым, граждан авиаций лётчик Харитон Романовым, республикысе ялозанлыкын сулло пашаеҥже Н.Романовым да молымат ушештараш лиеш. Кидпашалан чолга еҥ-влакат тыште ситышын улыт.
Мемнамат вученыт. А мом газет пашаеҥ-влак пӧлек шотеш намиен кертыт, мутат уке, книга ден газетым, календарьым. Эшежым шукерте огыл редакций Олор кундемысе марий Геннадий Ороспаевын «Май тылзе эртыш» книгажым савыктен луктын ыле. Сандене тудымат школ библиотекыш пуышна. Тачысе кечылан ты кыдалаш школышто 75 икшыве тунемеш, тудын пеленак йочасад уло. Тушко 40 наре йоча коштеш. Вашлиймашке толшо тунемше-влаклан марий калыкнан ик эн тӱҥ да эн тошто газетше, тудын журналистше-влак нерген каласкалышна. Марий тӱвыра, сылнымут, историй дене кылдалтше викториным эртарышна. Йоча-влак чолган вашештеныт да ешартыш йодышымат пуэныт.
Вашлиймашым сылнештараш самодеятельный мурызо да гармонист Виктор Комаров полшыш. Тудат ончаш толшо-влакын кумылыштым шкешотан да ойыртемалтше мастарлыкше дене савырен керте. Эсогыл школышто тунемше Сергей Савинов тудын дене пырля гармоньым шокталташ кумылжо лекте. Сергей изинек ты мастарлыкылан шӱмаҥын, школ коллективын участвоватлыме районысо мероприятийлаштат гармоньым шокта.
С.Носова.
В.Козловын фотожо.
