УВЕР ЙОГЫН

Нигӧат ок мондалт

23 январьыште Йошкар-Оласе Самырык-влакын полатыштышт оборонно-массовый да военно-патриотический паша месячник стартым налын. Тудо Отечествым аралыше-влакын кечыштлан пӧлеклалтын.

Месячник 23 февраль марте шуйна. Тиде жапыште Марий Элысе чыла район рӱдерыште, общеобразовательный школлаште, клублаште военно-патриотический шӱлышан мероприятий-влак эртат. Тушко общеобразовательный организацийлаште тунемше, армийыш кайышаш самырык еҥ, кадет класслаште тунемше, военно-патриотический клублашке коштшо-влак, вуз ден ссузласе студент-шамыч ушнат. Мутлан, кажне школышто ты теме дене класс шагат, патырлык урок эртат, шочмо элым аралымылан пӧлеклалтше фильмым ончыктат, экскурсий ден тоштерлашке лектыт.

РФ президентын указше почеш, юбилейный медальым ямдыленыт. Тудо «75 лет Победы в Великой Отечественной войне 1941-1945 гг.» маналтеш. Кугу куан дене тудым ветеран-влак А.Т.Трофимов ден А.В.Блямовлан кучыктеныт. Шуко ветеранже тиде вашлиймашке толын кертын огыл.

– Россий президент самырык тукымлан Кугу Отечественный сар, тудын геройжо-влак нерген исторический чыным каласышаш улына манын. Марий Элыштат кажне еш гыч, манаш лиеш, шучко сарыште лийын. Пырля моткоч кугу пашам ыштен колташ кӱлеш: ветеран-влаклан полшыман, шарнымаш дате-шамыч дене кылдалтше спорт да культур мероприятий-влакым эртарыман. Тылын труженикше, сарын йочаже-влаклан кугу тўткышым ойырышаш улына,– манын саламлымыж годым А.Евстифеев.

Ты кечын тӱрлӧ площадке пашам ыштен: спецназ войскан снаряженийже дене кылдалтше, «Воскресение» студент поисковый отрядын выставкышт… Утарыше службо, МВД, МЧС, ДОСААФ пашаеҥшамычат шкешт нерген каласкаленыт. Тиде мероприятийыште кумылан кажне еҥ боецын экипировкыжым, каскыжым, бронежилетшым, верысе ик войсковой частьын стрелковый вооруженийже ден бронетехникыжым кученак ончен кертын. Тыгайже поснак йоча-влаклан келшен.  

Сар, кучедалмаш, сеҥымаш дене кылдалтше дате-влаклан пєлеклалтше мероприятий деч посна военно-патриотический модмашым, тидлан келшыше тӱрлӧ акцийым эртараш палемденыт.  

Оборонно-массовый ден военно-патриотический паша месячник 2020 ийысе юбилейный дате-влаклан пӧлеклалтын: Кугу Отечественный сарыште Сеҥымашлан – 75 ий; 104-ше парашютно-десантный полкын 6-шо ротыжын подвигшылан – 20 ий.

Марий Эл правительстве, чынжымак, самырык тукымым военно-патриотически воспитатлыме шотышто кугу тӱткышым ойыра. Регионыштына 92 кадет класс, 144 юнармейский отряд, 83 военно-патриотический клуб пашам ыштат. Тушто чылаже 8,5 тӱжем утла еҥ шотлалтеш.

Е.ЭШКИНИНА

 

Опубликовать в Одноклассники

Добавить комментарий