УВЕР ЙОГЫН

«Элнан ӱшанле эргыже лийышт»

Шыже призыв умбакыже шуйна. Тений декабрь мучаш марте салтак радамыш элыштына 132 тўжем самырык еҥ шогалеш гын, Марий Элыште – 800 наре рвезе. Таче кечылан кундемна гыч кок шӱдӧ наре призывник порысым шукташ каен. Нуно тӱрлӧ войскаш логалыт. Тиде але тудо войскаш ойырымо годым кажныжын тазалыкшым, шинчымашыжым, спорт дене пеҥгыде кылым кучымыжым шотыш налыт.  

Шукерте огыл Йошкар-Оласе Воин чап монумент воктеч икымше тўшкаш чумырымо призывник-влакым службым эртыме верышкышт торжественно ужатеныт. Иктым еш, кокымшым родо-тукымжо, кумшо рвезым йолташыже-влак, поро сугыньым пуэн, жаплан чеверласеныт. Нунын коклаште Кужэҥер район гыч Н.Алексеевым (снимкыште) икой дене ужатеныт. «Ешыште пєръеҥ порысшым лийже манын шуктышаш, элнан ӱшанле эргыже лийшаш, ты йӱлам шуйышаш улыт», – пеҥгыдын маньыч нуно.

Армий уэмеш, тачысе саманлан келыштаралтше технике дене пойдаралтеш, мобильныйрак лиеш. Службо шотышто теният у вашталтыш уло. Марий Элын военный комиссарже С.Сидоркинын палемдымыж почеш, ындыжым призывниклан военный службо ончычсо семын присягым приниматлыме гыч огыл, а тудлан рядовой воинский званийым пуымо кече гыч тӱҥалеш. Тидыже сборный пунктышто ышталтеш. Туштак нунылан персональный электрон картым пуат. Тыгак але марте отсрочко дене пайдаланыше призывник льгото деч шке кумылын кораҥын кертеш. Мутлан, иктаж черлан кӧра рвезе армийыш кайыде кодын гын,  сайын эмлалтме деч вара приёмный комиссийыш йодмашым возышаш.

Южышт альтернативный службым эртыме денат пайдаланат. Черетан призывыште тыгайже ныл еҥ уло. Нуно Российын почтыштыжо пашам ышташ тӱҥалыт.

Тазалык дене пеҥгыде улмо да армийышке шуко еҥым  колтымо шотышто республикыштына Кужэҥер, Шернур, Советский районлам палемдат. Чаманен калысыман, салтак радамыш шогалме деч шылын коштшыжат улыт.

Е.ЭШКИНИНА

Опубликовать в Одноклассники

Добавить комментарий