Инвалид-влакын III всероссийский кеҥеж спартакиадышт почылтшаш кече марте шуко кодын огыл. Тудлан кузе ямдылалтмым Марий Эл вуйлатыше шкежак эскера.
Участник, уна-влак МарГУ-н, ПГТУ-н тӱшкагудылаштыже илаш, Йошкар-Оласе технологический колледжын столовыйыштыжо кочкаш тӱҥалыт. Спортсмен-влаклан 360 волонтёр полшаш ямдылалтеш. Нунын кокла гыч таче иктыж дене палыме лийына. Тиде – сутка мучко куржталме дене тӱнямбал кӱкшытан спорт мастер Римма Пальцева. Тудо волонёр-влак коклаште эн кугу ийготан.
Римма Алексеевна дене ик чевер кеҥеж кечын уремыште уныкаж дене коштмыж годым вашлийна. Саламлалтмеке, мутна рончалте.
– Римма Алексевна, могай амал дене Те волонтёр радамыш ушненда?
– Мый тӱрлӧ элыште таҥасенам, но йылмым пален омыл. Мыланем полшеныт, кушко кайышашым, мом ыштышашым умылтареныт. Шымле ийым теменам, кугу стартлашке лекмым чарненам, но обществылан эше кӱлеш лияш, йӧн лекме семын молыланат полшаш шонем. Сандене волонтёр радамыш ушненам.
– Тендан шонымаште, волонтёр могай лийшаш?
– Эн ончыч чыла шотыштат таза лийшаш. Ме чылан медосмотрым эртенна. Еҥ дене икойыш шуын моштышо, весела кумылан, шуко палыше лийшаш. Адакшым теве тыгай тӱшкаш пурышо еҥ-влак дене (инвалид коклаштыжат тӱрлӧ черан улыт) кутырен моштышаш. Такшым тидлан ме ончылгочак ямдылалтына. Мыланна лӱмын занятийым эртарат, туныктат.
– Занятийыште мом ыштеда?
– Самырык-влакын полатыштышт туныктат. Модыш гоч волонтёрын могай лийшашыжым пален налаш тыршена. Мыланна иктаж йодышым пуат, мутлан, инвалид коляске нерген. Ме моткоч писын ойлен, ончыктен, умылтарен вашештышаш улына. Вет коляскыжат тӱрлӧ: автоматический да монь. Участникын чержым шотыш налын, тудын дене кузе койшаш, кузе мутланышаш нергенат каласкалат. Тиде спартакиаде участник-влаклан шкештым моло дене иктєр шижаш эше ик кугу шӱкалтыш семын лиеш. 14-18 ияш ӱдыр-рвезе-влакын лач ты жапыште психикышт лушкыдырак, сандене койыш-шоктышыштат, тӱняончалтышыштат ик татыште вашталтын кертеш. Тидым ме умылышаш, нунылан полшышаш улына.
– Римма Алексеевна, Те могай тӱшкаш логалында?
– Мыйым самырык волонтёр-влак дене пырля атташелан шогалтеныт. Тыге ме уна-влакым вашлияш тӱҥалына.
– Чылажат сайын эртыже, полшаш шонымашда пайдале лийже.
– Тау.
Спартакиадыште 30 судья, 27 специалист пашам ышташ тӱҥалыт. Спортсмен-влак 14-18 ияш лийыт. Таҥасымаш-влак тӱҥ шотышто Йошкар-Оласе «Дружба» стадионышто, воктенак улшо теннис кортышто, «Спартак» физкультурно-тазаҥдыме комплексыште, Вӱд спорт полатыште эртат. Финалыште коштын кертдыме, уш-акыл дене начарын вияҥше, церебральный параличан, соҥгыра, сокыр участник-влаклан посна таҥасымаш лиеш.
Спартакиадым почаш Марий Элын Тӱвыра, печать да калык-влакын пашашт шотышто министерствыже сценарийлан проектым ямдылен. Тудым 14 июльышто «Марий Эл» ий полатыште 19 шагатлан торжественно почыт.
Е.ЭШКИНИНА.
