Общероссийский калык фронтын Марий Элысе пӧлкаштыже «Мыйын поликлиникем/ Мыйын ФАП-ем» всероссийский фотоконкурсышто сеҥыше-шамычым палемденыт.
Онлайн-йӱклымашын иктешлымашыж почеш, призёр-влак радамыш Кужэҥер районысо Токтайбеляк ФАП-ым фото дене ончыктышо Валентина Зилотова ден Йошкар-Оласе 3-шо №-ан йоча поликлиникын фотожо-влакым савыктыше Майя Васильева пуреныт.
Конкурс россиян-шамычын тӱткышыштым регионысо медико-санитарный полышым пуымо темылан ойыраш виктаралтын. Эн сайын але, мӧҥгешла, начарын шыҥдарыме поликлинике ден фельдшер-акушер пункт-влакым фото дене 42 регионышто илыше-влак ончыктеныт. Поснак Марий Эл Республик, Липецк да Калуга областьла гыч участник-влак чолган участвоватленыт.
Ушештарена, Россий Федерацийын Президентше, Общероссийский калык фронтын ончылъеҥже Владимир Путин Федеральный погынымашлан мартысе посланийыштыже изи кундемлаште илыше-влаклан первичный медполышым пуымо йӧным ышташ кӱштен. Тидын нергенак элым вуйлатышын «майысе указыштыже» ойлалтеш. Ситуацийым мониторитлаш да граждан-влак дене пеҥгыде кылым кучаш Президент ОНФ-лан ӱшанен.
М.ИВАНОВА.
