10-11 июльышто Киров область Кирово-Чепецк олаште вӱдуа дене пидме шотышто «Ива Дивная» всероссийский фестиваль-конкурс эртен.
Ты мероприятий сӱретче, кидмастар, калык промысел, предприниматель, тӱвыра паша отрасльыште тыршыше уста еҥ-влакым ушен. Элнан 15 регионжо гыч нуно миеныт: Чуваший, Мордовий, Угарман, Марий Эл гыч…
Фестивальын программыже поян лийын: «йыргешке ӱстел» йыр мутланымаш, калык мастарлык ярмиҥга, кидпашалан туныктымо класс-влак эртеныт, тыгак кумылым нӧлтымӧ моло площадке пашам ыштеныт.
Марий Эл гыч тушко шке пашажым ончыкташ Оршанке район Тошто Крешын ял гыч Виталий Кудрявцев миен. Ме тудым корзиҥгам да моло ӱзгарым вӱдуа гыч пидше уста еҥ семын веле огыл, тыгак тагына пушым ыштыше семынат палена. Тошто Крешын мастарлык пӧртын ончычсо директоржо кызыт шкенжын суртыштыжо «Пу вий» мастар кудым почын, туныктымо класс, экскурсий-влакым эртара. Экскурсийжым тудо туге эртара, тунар шуко уверым пуа, варажым шкендынат кидпашам ышташ кумыл лектеш. В.Кудрявцев республикыштына ик эн ончыч «Марий Элын калык мастарже» лӱм дене суапландаралтын. 30 ий утла кидпашам шуктышо ты уста еҥ деке лӱмын тунемаш вес вес кундемла гычат толыт.
А конкурсышто тудлан, моло участник семынак, кандаш шагат жапыште кидпашам ыштен ончыкташыже логалын. Марий пӧръеҥ кок тӱрлӧ корзиҥгам пидын. Конкурсын лектышыже почеш тудо кокымшо верлан кокымшо степенян лауреат лӱм дене палемдалтын. Шкенжын ойлымыж почеш, тудо тӱрлӧ кӱкшытан фестиваль-конкурслаште шке мастарлыкшым ончыкташ да тудым шуараш кумылан. Ныл гана Россий кӱкшытан тыгай мероприятийыште лауреат семын палемдалтын гын, моло дипломжым шотленат от пытаре.
Кидмастар эре пашаште, вет корзиҥгалык материалым – вӱдуам – идалык мучко ямдылыман. Ончен куштымо, тодыштын пӱчкедыме деч посна тудым нӧртыман, шолтыман, эрыктыман. Августышто тудо вес мастар Николай Кузнецов дене пырля Свияжск отрошто эртышашлык пуш фестивальыш каяш ямдылалтеш. Тушто шке ыштыме тагына пушыж дене Юл эҥерыште ийын кошташ йӧн лийшаш.
С.Носова
Снимкыште: В.Кудрявцев конкурслан ыштыме пашаж дене.
Фотом В.Кудрявцевын соцкыл лаштыкше гыч налме.
