Звенигово районлан тений 95 ий темеш, Звенигово оласе шӧр комбинатлан – 80 ий. Ужыда, могай кужу корным тудо эртен. Ты чапле датым вашлияш тичмашын огыл мутым кучышо «Звенигово оласе шӧр комбинат» обществе кузе ямдылалтеш? – тидын шумлык тудын генеральный директоржо Л.А.СТОЛЯРОВА дене кутыралтена.
— Людмила Александровна, лӱмгече идалыкыште эн ончычак предприятийын эртен толмо корныжым шарналташ кӱлеш докан.
— Тиде корно куштылгак лийын огыл. Предприятий 1939 ийыште негызлалтын. Икымше зданийже Юл эҥер серыште верланен да пу дене ыштыме лийын. 1940 ий мучаште тудым Звенигово олан ӱлыл ужашышкыже, Горький уремыш, кусареныт, да кызытат – туштак. Кодшо курымысо 80-ше ийла мучаште заводым пужен ышташ шонен пыштеныт, а чынжым гын угыч чоҥеныт да 90-ше ийла тӱҥалтыште пашаш колтеныт. Чыла тиде паша предприятийын ончычсо генеральный директоржо Пётр Владимирович Столяровын (тудо заводым кужу жап вуйлатен) тыршымыж дене ышталтын. Тунам ямде предприятий-влак петырналт шаланеныт, а тыште угыч чоҥаш шотым муыныт.
— Неле жапыштат комбинат пашажым луштарен огыл. Лӱмгечыжымат сай лектыш дене вашлияш ямдылалтеш, векат?
— Предприятийна ончычат, кызытат шуко тӱрлӧ шӧр продукцийым ыштен луктын да луктеш. Кызыт, мутлан, 40 утлам темлена. Тушто сыр кугу верым налеш. Тудыжо пеҥгыдын чыпчыктарыме, шинчалтыме, пушкыдо, левыктыме улыт. Идалыкыште 3 тӱжем тонн нарым ямдылена. Лӱмгече вашеш эн кӱшыл классан эше кок тӱрлӧ сырым темлаш шонена.
— Сырдам тамлен ончышна гын, пеш тутло улмаш. Кушко тудым колтеда?
— Шкенан республик мучко веле огыл, ӧрдыжкат. Шукыракше, 80 утла процентше, ӧрдыжкӧ кая: Нижний Новгородыш, Москваш, Санкт-Петербургыш, Новосибирскыш, Тольяттиш, Ульяновскыш, Чебоксарыш да моло вереат. Тутло ок лий гын, огыт нал ыле, шонена. Вет мемнан девизнак тыгай: пеҥгыдылык, качестве, ак. Да тиде кум умылымашлан келшен толаш тыршена.
— А тидлан мо кӱлеш?
— Жап дене тӧр ошкылшашлан производствым эреак технически уэмден шогыман, оборудованийым шот дене кучыман. Тыгай шонымаш денак пытартыш кок ийыште сырым фасоватлыме да йӱкшыктарыме камеран 441 квадратный метр кумдыкан цехым чоҥышна. Тыгак шӧр продукцийым фасоватлыме автоматике линийым да тудым перерабатыватлыме моло оборудованийым нална. Тидлан производствыш 20 миллион утла теҥге инвестицийым пышташ логале. Теният тылеч шагал огыл кучылташ перна, векат.
— Чапле оборудованийлан специалистшат уста лийшаш улыт…
— Комбинатыште опытан специалист-влак ыштат. Нуно республик веле огыл, Россий кӱкшытан награде денат палемдалтыныт. Самырык пашаеҥ-влакым шке примерышт дене шуарен куштат. Ты радамыште тӱҥ механик Николай Михайлович Максимовым, олмыктышо слесарь Сергей Васильевич Скворцовым, лабораторий начальник Людмила Виссарионовна Соловьёвам, производство начальник Валентина Ивановна Мишинам да молымат ончыкташ лиеш.
— Ончыкылык шонымашда могай?
— Мый ӱшанем, нелылыкым чытен лекше тыгай опытан да профессионал-влак дене кеч-могай задачым шукташ лиеш. Мо ончылно вуча, мом эше ыштен шуктымо огыл – чылажат мемнан вийлык. Тыгай шонымаш денак шкенан чыла пашаеҥым предприятийнан да районнан шушаш лӱмгечышт дене саламлем да у кӱкшытыш шуаш тыланем.
— Меат ты саламлымашке уло кумылын ушнена. Пашада ушнен толжо, манына.
Юрий Исаков.
Снимкылаште: аппаратчик-влак Н.Батайкина ден А.Чеснова; производство начальник В.Мишина; сыр цехын мастерже Н.Васильева, лабораторий начальник Л.Соловьёва да микробиолог Л.Пониматкина; сырым аралыме вер; сырым ямдылыме линий; технолог Г.Маркова предприятийын продукцийже дене республикысе выставкыште палдара.
Авторын да предприятийын архивше гыч налме фото.
