9 декабрьыште Марий Эл вуйлатыше Юрий Зайцев правительстве член да республикысе муниципал район вуйлатыше-влак дене совещанийым эртарен.
Тӱҥалтыште тудо Марий Эл Республикыште Россий МЧС тӱҥ управленийын начальникше Виктор Шангиным черетан воинский званийым, эл кӧргысӧ службын генерал-майоржо лӱмым, пуымо дене саламлен.
У ий да Рошто пайрем кечылаште республикыште илыше калыклан лӱдыкшыдымылыкым ыштыме паша нерген Степан Воронцов ойлен.
Марий Эл вуйлатышын кӱштымыж почеш кундемыштына ялозанлыклан кӱлешан мландым учётыш налме (инвентаризаций) паша план-графикым палемдыме. Тидыже яра кийыше мланде участке-влакым рашемдыме да кучылташ тӱҥалме шонымаш дене эртаралтеш. Тидын нерген республикын кугыжаныш пого министрже Алексей Плотников рашемден. Тудын мутшо почеш, тыге кажне муниципал районышто ялозанлык мландым кузе кучылтмо да права дене келшыше документ-влак деч посна мланде дене пайдаланыме сӱрет-влак раш палдырнат.
Марий Элыште «Оласе йырвелым йӧнаным ыштымаш» федеральный проект кузе шукталтме нерген республикын чоҥымо да ЖКХ министржын алмаштышыже Людмила Домрачева каласкален, тыгодым тудо палемден: кумдыкым тӱзатыме пашалан шушаш ийыште 187 млн. теҥге ойыралтеш. Тыгак «20 тӱжем чоло еҥ илыман изи ола» тӱшкаште чыла шотыштат йӧнан оласе средам ыштыме эн сай проект-влакын VI Всероссийский конкурсышт нерген ушештарен. Ты конкурсышто Марий Эл гыч 2 проект сеҥышыш лектын, нуным 2023–2024 ийлаште шукташ тӱҥалыт.
Республикын внутренний политике министржын обязанностьшым жаплан шуктышо Андрей Дергачев кугыжаныш кучем да верысе самоуправлений орган-влакын могай пашам шуктымышт нерген информацийым пален налме шотышто Федеральный законын нормыжым шуктымашке виктаралтше мероприятий-влакым радамлен.
Козьмодемьянскын мэрже Михаил Козлов 2023 ийыште «Спорт – илышын нормыжо» регионысо проект негызеш оласе стадионым ыштыме нерген ойлен.
Марий Эл вуйлатыше Ю.Зайцев палемдыме чыла пашам тӱрыснек да жапыштыже шукташ кӱлмӧ нерген шижтарен да каласен: «Ниможымат шке шотшо дене колташ ок лий. Решатлен шуктыдымо йодыш лийшаш огыл».
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
