Йошкар-Оласе волонтер-влак чодыраште йомшо-шамычым кычалаш тунемаш тӱҥалыт.
Тидлан лӱмын курсым «Лиза-Алерт» кычалше-утарыше отряд почеш. Тудын ты пашалан опытшо уло, тымарте Марий Элысе, Татарстанысе да Чувашийысе азапыш логалше еҥ-шамычым кычалше да утарыше активист-влакым ушен шога. Нуно волонтер-влак дене икымше гана веле огыл вашлийыт.
2015 ий гычак палыме улыт. Тиде жапыште волонтер-влакым азапыш логалме годым шкем кузе кучаш, йоча да нунын ача-авашт дене пашам ышташ туныктеныт. Ты гана 16-17 сентябрьыште тунемме-тернировко курс эртаралтеш. Икымше кечын лекцийым колыштыт, кокымшо кечынже Йошкар-Ола воктенсе чодырашке практикыш лектыт. Кӧ командыш ушнаш да кычалаш да утараш тунемаш шона гын, тудо отрядын «шокшо линийышкыже» 8-800-700-54-52 номеран телефон дене увертарен кертеш.
А.АНДРЕЕВ.