Энергетике
Игечым да лӱдыкшым ончыде
«Рӱдӧ да Юл кундем Россетьлан» вуйын шогышо «Рӱдӧ Россетьын» генеральный директоржо Игорь Маковский энергокомпанийын кодшо ийысе пашажым иктешлыше да тенийысе задачыжым рашемдыше коллегийын заседанийжым Липецкыште эртарен.
Тушко нине компанийласе 20 филиалын вуйлатышыт, РЭС-влакын начальникышт, профсоюз организаций-влакын председательышт, Самырык-влакын советыштын лидерышт, тыгак тунемме рӱдер-влакын директорышт, чылаже 200 утла еҥ, погыненыт. Коллегийын пашажым видеокыл йӧн дене эше 20 тӱжем утла еҥ ончен.
Игорь Маковский палемден: таче энергетик-влак писын вашталт толшо условийыште пашам ыштат. Игече эреак нелылыкым луктеш, чек воктенысе регионлаште веле огыл, кӧргыштыракат вес эл гыч лӱдыкшым ыштен шогат. Тидым ончыде, 2023 ийлан палемдыме чыла показательыш шумо.
Вуйлатыше тыгак ешарен: компанийлаште 2024 ийым Физкультур да спорт идалык семын увертарыме. Да тидын дене келшышын, икмыняр мероприятийым палемдыме: «Спорт энергий» марафон, ГТО нормативым сдатлымаш, кеҥежымсе спартакиаде, «Ача, ава, мый – спорт еш» фестиваль лийшаш улыт. Нуным иктешлымеке, спортлан эн кумылан да чолга филиал рашемдалтшаш.
«Мемнан пашаште, спортысо семынак, палемдымашке шуын моштыман. Тыгодым шкендынат, командынат тыршымышт кӱлыт. Сайын да ӱшанлын ыштымына дене ме тидым ик гана веле огыл пеҥгыдемденна. Тыглай огыл 2023 ийыште сай результатыш шумылан шуко тӱжем еҥан пашаче ешланна таум ыштем. 2024 ийлан мемнан планна эшеат кугурак, но тудымат шуктена манын ӱшанем», – каласен Игорь Маковский.
Ю.ИСАКОВ ямдылен.
ИнформБюро телеграмм-канал деч налме фото
