Тиде кечылаште Владимир областьыште самырык-влакын «Территория смыслов» всероссийский форумыштын «Россий – йӧным пуышо эл» сменыже мучашлалтын. Тудо Российын тӱрлӧ кундемлаж гыч 1000 еҥым иквереш чумырен. Форумын пытартыш кечынже участник-влак команде дене ямдылыме проектыштым араленыт, эн сайжым грант дене палемденыт да нунын коклаште Йошкар-Ола гыч ӱдыр-влакат лийыныт!
Теве нунын лӱмышт – Екатерина Гунько ден Кристина Фоминых. Икымшыже «Разум» студент интеллектуал толкын виянмаш» проектым ямдылен да арален гын, кокымшыжо «Привет, Вася!» разработкыж дене палдарен.
– «Привет, Вася!» проектын негызыштыже – мобильный приложений. Тудын полшымыж дене 8-ше гыч 11-ше класслаште тунемше-влак регионысо ик эн ончыл предприятий дене кылым кучен кертыт. Тыге йоча-шамыч эше школышто тунеммышт годымак организацийын пашаже нерген келгынрак палаш тӱҥалыт. Проект идалык да кум тылзе илышыш шыҥдаралтшаш, – каласыш Кристина Фоминых.
Тудын мутшо почеш, проект Россий президент В.Путинн «майысе куштымашыже-влакын» концепцийжылан келшышын ышталтын.
А Екатерина Гунькон команде дене ыштыме пашаже интеллектуал толкын дене кылдалтын.
– Йошкар-Олаште интеллектуал клуб шуко уло, но тушко рӱдолаште илыше-влак гына коштын кертыт, – ойла ӱдыр. – Тыгодым районласе самырык еҥ-влак ӧрдыжеш кодыт. Мемнан проектын тӱҥ шонымашыже – тиде ситыдымашым кораҥдаш.
Форумышто Кристина 1 200 000 теҥге грантым сеҥен налын, а Екатерина – 100 000 теҥге кугытаным.
Г.Кожевникова.