самырык тукым
УВЕР ЙОГЫН

 «Мемнан шӱмна – ава пелен»

Тыге каласеныт Национальный президент школ-интернатыште «Самырык тукым» республик кӱкшытан конкурсыш чумыргышо ӱдыр-рвезе-влак. Ты гана конкурс авалан пӧлеклалтын, сандене усталыкым ончыктышо 13школын тунемшыже-шамыч авалан, ковалан эн поро, ныжыл, йӧратымаш шомакым ойленыт.

Мероприятийым Образований да науко ден Тӱвыра, печать да калык-влакын пашашт шотышто министерстве-влак, Марий тӱвыра рӱдер эртареныт.

Кажне школ оҥай, весела номерым ямдылен. Икте мурымаш да куштымаш дене гына серлаген гын, весе сценкымак ончыктен. Тыгодым икшыве-шамыч аван образшым, ты тӱняште тудын эн шерге улмыжым почын пуэныт.

Южо тунемше моткоч чаплын выступатлен. Куштымышт ден мурымыштым ончен, нунын верч кугешныме кумыл шочын. Илен-толын, нине ӱдыр-рвезе-шамыч сай артист лийын кертыт. Мутлан, Йошкар-Оласе 14-ше №-ан гимназий гыч ӱдыр-рвезе-влак туге мастарын муралтен, тавалтен пуышт, профессионал гаяк кертыч манаш лиеш.

Волжский районысо Памар селасе школын чолга ӱдыржӧ-шамыч весела мыскарашт дене кумылым чотак нӧлтышт. Снежанна Афанасьева гын поснак чот керте.

А Советский районысо Ӱшнур школын  тунемшыже-влак калыкын чонжым«Кече гае авайна» номерышт дене савырышт. Нунын «Пире да шым пача»  йомак негызеш шындыме сценкышт авалан полшаш кӱлмым, тудым йӧратымым ончыктен. Килемар кундемысе Церкысола селасе школынат «Кым ыдыр» номерышт туныктымо шотан лийын.

Жюри кажне коллективын мастарлыкшым аклен да Марий тӱвыра рӱдер лӱм дене чылаштлан Тауштымаш ден пӧлекым кучыктен. А сеҥышыш Килемар районысо Церкысола селасе  школ лектын. Кокымшо вер дене Советский районысо Ӱшнур школын ӱдыр-рвезыже-шамыч палемдалтыныт. Кумшо верым Йошкар-Оласе 14-ше №-ан гимназий налын. «Чолгалык да усталык» номинацийыште Параньга район Олор школ ойыртемалтын. «Мастар тукым» номинацийыште — Шернур район Лажъял школ.  «Марий йӱлам аралыше» номинацийыште – Курыкмарий район Эмансола школ.

Школ-интернатын  фойештыже «Шыргыжал, авайна!..»  выставке пашам ыштен. Йоча-влакын шке кид дене сӱретлыме саламлымашан открытке кокла гыч жюри эн сайжым ойырен. Икымше верым Оршанке кыдалаш школ гыч Софья Козлова, кокымшо верым Шернур район Койсола школ гыч Богдан Колчин, кумшо верым  Марий Турек районысо ешартыш шинчымашым пуышо рӱдерын тунемшыже Виктория Камалеева налыныт.

Л.ШАБДАРОВА.

М.Скобелевын фотожо.

Снимкыште: Курыкмарий районысо Эмонсола школын самырык артистше-влак т- туныктышышт дене.

Опубликовать в Одноклассники