Марий Элыште, рашрак каласаш гын, Медведево районысо Лӱльпан поселкышто, томаша лийын: школышто 7-ше классыште тунемше 13 ияш ӱдыр 48 ияш пӧръеҥ деч мӱшкыраҥын. Тиде веле мо?! Тудо — ачажын йолташыже да пашам пырля ыштышыже.
Коклаштышт 35 ий ойыртемым ончыде, нуно ушнаш шонат. Ик эн тӱҥ амалже – ӱдыр 5 тылзе мӱшкыран. Мо оҥайже, нуно шке кылыштым ни огыт шылте, ни тидын деч огыт вожыл. А вет пӧръеҥын ватыже уло. Адакшым тудо – инвалид! Но тидат пӧръеҥлан чарак огыл, коеш. Тудо пелашыж деч официально ойырлынеже да 7-ше классыште тунемшым марлан налнеже.
Но кызыт Лӱльпаныште сӱанлан ямдылалтмаш веле огыл, эше следствий кая. Тиде факт шотышто уголовный делам тарватеныт.
Марий Элыште йочан праваже шотышто уполномоченный Евгений Бурдон мутшо почеш, республикыште 16 ияш марте ешым чумыраш чаралтеш. Сандене, ушнынештак гын, нунылан могай кундемыште тыгай чарымаш уке, тугай регионыш каяшышт логалеш.
Но томаша нерген йоча омбудсмен шкежат вучыдымын пален налын. А кунам федеральный СМИ-лаште тиде факт нерген возаш тӱҥалыныт, Марий Эл вуйлатыше Александр Евстифеев Евгений Бурдо дене вашлийын да тудым шылтален.
— Правам пудыртымо факт нерген пытартышлан пален налыда гын, тиде тендан пашам ыштыдымыда нерген ойла. Иктаж-могай министерстве дене кылым ыштен кертдыме нерген мый тендан деч ни йодмашым, ни вуйшиймашым налын омыл. Должностной лица семын те йочан праважым да интересшым аралышаш улыда. Мо лиймым рашемдаш тыланда икмыняр кечым пуэм. Вес арня тӱҥалтыште отчетым ыштеда. Тыгак республикыште йочан праваж ден интересше кӱлеш семын аралалтышт манын, шке паша правилышкыда вашталтышым пуртымо нерген радамледа, — каласен республик вуйлатыше.
Л.Камалетдинова.
