УВЕР ЙОГЫН

Медицине: Эмлалтше ӱдырамаш-влак шучко диагнозан пациент-шамычлан яра полшат

Рак деч эмлалтше ӱдырамаш-влак Республикысе онкологий диспансерыште шучко диагнозан пациент-шамычлан яра полшат. 

Июньышто Российын кандаш регионыштыжо, ты шотыштак Йошкар-Олаште, азам ыштен кертме сферыште онкологий диагнозан ӱдырамаш-влакын психосоциальный реабилитацийыштлан виктаралтше проект илышыш пурен. Тидын дене келшышын, онкологий диспансерлаште консультацийым иктӧр пуымо (равный) кабинет-влак почылташ тӱҥалыныт.

Иктӧр консультант-влак шӧрту але азам ыштен кертме системын моло органыштыже улшо рак деч эмлалтше ончычсо пациент улыт. Нуно консультацийым эртараш лӱмын тунемыныт, сандене черын психологический да социальный аспектше-влакым эмлалтме да реабилитацийым эртыме чыла йыжыҥыште палат.

Онкологий диспансерыште эмлалтше чыла ӱдырамаш консультант дене эмлалтме йӧн, ончылно мо вучымым палыдыме шумлык лекше лӱдмашым сеҥыме, шке ийготысо пациентын опытшо, диагнозшо нерген мутланен, тыгодымак эмлалтме шотышто организационный да юридический але «йӧндымӧ», «вожылтарыше» йодыш-влакым рашемден кертеш.

Консультант-влак консультацийым доброволец семынак яра пуат. Кызыт нуно элыштына шӱдӧ утлаш погыненыт. Чылаштым «Ӱдырамаш тазалык» сообществе чумырен.

21 июньышто Республикысе онкологий диспансерын радиологический корпусыштыжо консультацийым иктӧр пуымо кабинетым торжественно почмо. Тудо Йошкар-Оласе Пролетарский уремын 60-шо пӧртыштыжӧ верланен. Консультаций шотышто медицине психолог Лариса Владимировна Хохловалан 89024381951 номеран телефон дене йыҥгыртыман.  

М.ИВАНОВА.

Опубликовать в Одноклассники

Добавить комментарий