УВЕР ЙОГЫН

Юлын пурла серыштыже вучат

Июнь мучаште Москосо Калык-влакын пӧртыштышт «PROбренд» туризм сферыште икымше тӱнямбал марктетинг конкурс иктешлалтын ыле. Тушто Козьмодемьянскысе турист-увер рӱдерын темлыме «Среди океана стульев» проектше «Бренд сувенир продукций» номинацийыште Гран-прим сеҥен налын. Каласен кодыман: ты проект  Козьмодемьянскыште кажне ийын эртаралтше «Бендериаде» койдарчык да мыскара фестиваль дене кылдалтын. Тений мероприятий 27 июльлан палемдалтын.

Тений фестиваль 25-ше гана эртаралтеш. Сандене программыже чынжымак поян лиеш. Музыкальный, куштымо, спорт площадке-влак пашам ышташ тӱҥалыт. Чапланыше «Звук» вокально-эстрадный студий сай концертым ямдыла. Творческий студий-влак шке программыштым темлаш тӱҥалыт. Икшыве-шамычынат кумылыштым нӧлтышӧ программе ямдылалтеш, эсогыл нуныланат дискотеке лиеш. 

«Паллада» парус клубын воспитанникше-шамыч показательный выступленийым ончыктат. Ты клубын «Святой Косьма» суднышкыжо экскурсий эртаралташ тӱҥалеш, вет тудым Россий Президентын грантше кӱшеш ыштыме.

Кече мучко чыла тоштер пашам ышташ, тӱрло сатум ужалаш тӱҥалыт. Тыгак пӱкеным ужалыме йӱлаш савырныше аукцион, Остап Бендер ден вашлиймаш, шахмат турнир лийыт. Турнир манмаштыже, тений 15 кумылан еҥ Российын эн самырык гроссмейстерже Сергей Карякин дене модын кертыт. Пелен шахматым гына кондыман. Икманаш, 27 июльышто Юлын пурла велысе марий олаже чылаштым пайремыш вуча.

С.Носова.

Опубликовать в Одноклассники

Добавить комментарий