Лӱмгечылан пӧлеклалтше пайремыште диспансерым вуйлатыше С.Бочкарёв ден тыште пашам ыштыше-влак веле огыл, уна-шамычат тиде медицине тӧнежын кажне структур подразделенийже нерген поро мутым гына ойленыт. Марий Эл Республикын Тазалыкым аралыме министерствыжын лӱмжӧ дене диспансерын коллектившым министрым алмаштыше А.Ушакова саламлен.
40 ий жапыште наркослужбын специалистше-шамыч калыкын тазалыкшым аралыше да правопорядкым кучышо ятыр службо дене пеҥгыде кылым ыштеныт. Тидыжым регионысо Образований да науко, Внутренний политике, верысе самоуправленийым вияҥдымаш да юстиций министерствыла, ГИБДД, Йошкар-Олан прокуратуржо, Ийготыш шудымо-влакын пашашт шотышто комиссий да моло ведомство, службо гыч толшо-влакын саламлыме мутышат пеҥгыдемден. Нуно чыланат диспансерысе врач-влакын профессионализмыштым кӱкшын акленыт, поро кумылан, эреак полшаш ямде улмыштым палемденыт.
Пайремыш толшо-влак шке жапыштыже алкоголикыш савырныше, диспансерыште кужун эмлалтше да ынде шукертак таза илыш-йӱлам кучышо ончычсо пациентын шӱм вургыж, тыгодымак моткоч оҥайын каласкалымыжым тӱткын колыштыныт. Теве лачшымак тыгай еҥ-влаклан – кӧн осал койышыжо уло, кӧ шке илышыжым сай велыш вашталтынеже – наркодиспансерын коллективше нылле ий лым лийде пашам ыштен да умбакыжат тыршаш тӱҥалеш.
М.ИВАНОВА.
