УВЕР ЙОГЫН

Атаманланда тӱрыснек ӱшанем

Тений элна Кугу Отечественный сарыште сеҥымылан 75 ий теммым палемда. Россий калыклан чумыр илыш корныштыжо шуко неле-йӧсым ужашыже да чытен лекташыже логалын. Но кажне гаяк совет ешлан кугу ойгым кондышо, шӱм-чонеш кызытат вӱрланыше сусырым кодышо событий тетла лийын огыл да лийшашат огыл. Тудо пеш шуко ял ден олам пытарен, пеш шуко еҥын илышыжым налын… Тидын денак Сеҥымаш мыланна – шергакан да кугу событий.
Волжский районышто Кугу Отечественный сар жапыште калыкын ыштыме подвигшылан пӧлеклалтше мероприятий-влак умбакыже шуйнат. 19-20 сентябрьыште Купсола селаште верланыше Пеш шнуй Шочынаван леведышыже храм пелен «Покровский — 2020» II региональный военно-полевой сбор (тунеммаш) эртен. Тудын кышкарыштыже Сеҥымашлан 75 ий теммылан пӧлеклалтше бойын реконструкцийже лийын.
Мероприятий землякна, Олыкъялыште шочын-кушшо Совет Ушемын Геройжо Зинон Филиппович Прохоровын 76 ий ончыч, 1944 ий 19 сентябрьыште, ыштыме подвигшылан пӧлеклалтын. Тудо тушманын амбразуржым оҥжо дене петырен.
«Кажне еш кугезе коча-коважым порын шарна, нунын наградыштым чаткан арала. Кугу Отечественный сарын геройжо-шамычын подвигышт, элым йӧратымышт нерген каласкалыме годым кушкын толшо тукымын шке калык верч кугешныме, тудын гаяк лӱддымӧ лияш кумылжо лектеш. Тылеч посна кугезе тукым ончылно кажне ошкыллан мутым кучаш тыршымышт вияҥын толеш. Сандене тиде сборымат Совет Ушем Герой Зинон Прохоровлан пӧлекленна», — палемден Российын да Зарубежьен казак-воинышт ушемын (СКВРиЗ) Марий Элысе региональный пӧлкажын «Покровский» хуторжын атаманже Эдуард Кузнецов.
Военно-полевой сборыш СКВРиЗ-ын Киров областьысе «Виче» (Киров ола), Татарстан Республикысе (Казань ола) регионысо пӧлкалаштын, Оренбург казак войскалан угыч вияҥаш полшышо регион-влак кокласе мер организацийын «Альметевский» татарстан пӧлкажын (Альметевск ола), Волжский казак войскан «Боровецкий» хуторжын татарстан пӧлкажын (Набережные Челны ола), Хуторский казак обществын Волжск оласе «Волжский» хуторжын, Казань оласе казак обществын «Казанский» хуторжын, Хуторский казак обществын «Никольский» хуторжын (Канаш ола, Чуваш Республик), Уфимско-Табынский отдельский казак обществын Хуторский казак обществыжын «Бирский» хуторжын (Башкортостан Республик), Хуторский казак обществын «Архангельский» хуторжын (Зеленодольск ола) поход службыжо-влакын мобилизационный группышт толыныт. Нуным СКВРиЗ-ын Марий Элысе «Покровский» хуторжо Юлсер кундемын Купсола села кумдыкыштыжо вашлийын.
Мероприятийыш Москва гыч кугу уна «Российын да Зарубежьен казак-воинышт ушем» казачествым вияҥдыме шотышто общероссийский мер организацийын верховный атаманже Н.Дьяконов толын. Николай Леонидович атаман-влакын советыштым эртарен. Тушто венно-полевой сборыш элнан тӱрлӧ луклаж гыч толшо атаман-влак лийыныт.
— Таче Российын да Зарубежьен казак-воинышт ушем элыштына ончылно кайыше мер казак организацийлан шотлалтеш. Тиде Россий мучко – 78 регион. Да 45 общине – йот эллаште. Виктарыме структурым федеральный округ-влак еда шеледыме, кажне округышто мыйын алмаштышем-влак, рашемденрак каласаш гын, полномочный представителем-шамыч улыт. Чыла службо тӱҥ виктем дене кутырен келшыме почеш эрта. Ме Россий Федерацийын Обороно министерствыжлан резервым ямдылена да шочмо кугыжанышланна служитлаш ямде улына, — саламлыме мутыштыжо ойлен верховный атаман Н.Дьяконов. – Тиде сборыш толшо чыла еҥлан тауштем, поснак – Евгений Усков ачалан: уна-влакым вашлиймыжлан, кушкын толшо тукымым духовно-нравственный шӱлышеш воспитатлыме пашалан кугу тӱткышым ойырымыжлан.
Атаман-влакын советышт деч вара пасусо лагерьыште тактико-специальный ямдылалтмаш, шагал куснылшо группо-влакын пашашт, зданийым руалтен налмаш, боевой щитла дене пашам ыштымаш, медицине велым ямдылалтмаш, тактический ориентирований, альпинист ямдылалтмаш гай дисциплине-влак дене тунеммаш эртен.
18 ияш марте подростко-влак коклаште кум медаль комплектым модылтеныт. Калашниковын модернизоватлыме автоматшым погымо да рончымо шот дене икымше верым Родион Игряшов налын, кокымшым – Григорий Демин, кумшым – Никита Григорьев. Кӱзым туран кышкылтме
спорт таҥасымаште икымше вер Денис Трутниковлан логалын, кокымшо – Владимир Власовлан, кумшо – Родион Игряшовлан. А пневматический оружий гыч лӱйкалыме таҥасымаште медальын чыла комплектшым «Клинок» военно-патриотический клубын ӱдыржӧ-влак Елизавета Картузова, Дарья Картузова да Анастасия Петрова сеҥен налыныт.
Кокымшо кечын изи группо-влак дене практический занятийым чодыраште эртареныт. Тыгодым ик группылан засадым рашемдаш, тудым, тулым почын, тӱҥ группо дене ушаш да лӱдыкшыдымӧ верыш кораҥаш кӱлын. Тиде Сеҥымашлан 75 ий теммылан бойын шкешотан реконструкцийже лийын. Шындыме задачым чыла группо шуктен.
Пасушко лекше участник-влакын мутышт гыч, сбор кугу кӱкшытыштӧ эртен. Кок кечынжат кухньо пашам ыштен, 150 казак-воинлан шокшо кочкышым пукшен. Икымше кечын Александр Сабанаев кол шӱрым шолтен, кокымшо кечын Казань гыч толшо повар-влак кок под пловым ямдыленыт.
Мероприятийым мучашлыме годым пасусо лагерьыште тӱрлӧ дисциплине дене тунеммашым кӱлынак эртымылан чыла командылан «Покровский — 2020» II региональный военно-полевой сборышто чолган участвоватлымылан» дипломым кучыктеныт, кажне участниклан – Пеш шнуй Шочынаван леведышыже храмын фотосӱретешыже келыштарыме 2021 ийлан календарьым.
«Кугу Отечественный сар, шучко событийла да кугезына-влакын лӱддымылыкышт ден подвигышт нерген шарнымашым курым гыч курымыш, тукым гыч тукымыш арален кодышаш улына. Кушкын толшо тукымым Кугу Отечественный сарын ветеранже ден участникше-влакым пагалаш да элна дене кугешнаш туныктенак шогаш кӱлеш», — палемден «Покровский» хуторын походный атаманже подхорунжий Александр Глухов.
Мероприятий деч вара ме верховный атаман дене мутым алмаштышна.
— Мыланем Марий Эл моткоч келшыш, поснак – тудын чодыраже, южшо, пӱртӱсшӧ. Тиде пӱртӱсын тӱкыдымӧ лукшо. Ме республик мучко шукак ышна кудалышт, сандене шуко мом ужде кодым. Тышке эше пӧртылам да регионын, тыгак райондан шнуй верлаштым ончен савырнем. Адакше регионыштыда кугу мероприятийым эртараш уже палемденна, — Марий кундем нерген шонымашыж дене палдарыш Николай Леонидович. – Эн ончычак СКВРиЗ-ын регионысо атаманже Эдуард Кузнецовлан мероприятийым ямдылымыжлан да эртарен колтымыжлан тауштем. Тиде тунеммаш моткоч кӱлешан, молан манаш гын Юл кундем федеральный округышто мемнан 12 представительствына сайын вияҥеш. Ме общевойсковой ямдылалтмашым эртарена. Содыки ме казак улына, да ме шочмо элым, ешым, братствым аралаш эре ямде лийшаш улына. Тиде сбор ойыртемалтше климатан кундемыште эртыш. Тиде пеш сай манын шотлем. Мемнан ямдылалтмашна-влак тӱрлӧ: курыкан, вӱдан, степьян – регионышто эртат. Чыла сай лиеш гын, иктаж тылзе гыч тыште Юл кундем федеральный округын чыла 12 представительствыже погына.
— Те сбор-влак Марий Элыште эрташ тӱҥалыт манын ойлышда? Тугеже мыланна ӱшанеда?
— Мый калыкым, пашан лектышыжым ужам. Эдуард Кузнецовлан тӱрыснек ӱшанем. Тудын тыршымыжым да казак-шамычын тидым аклымыштым ужам. Сандене ме Купсола селасе гай базыште ямдылалтме рӱдер семын шогалына. Мый тышке чыла тидым шке шинчам дене ужаш да аклаш толынам. Тӧрлатымашым пуртенам, замечанийым ыштенам. А тыгеже пашадам «сай» семын аклем. Ончалаш да аклаш толынам… Тылеч кугурак мероприятийым эшеат сайын эртараш манын, ситыдымашын куштырак улмыжым, мо дене полшаш лиймым, мом тӧрлаташ кӱлмым умыленам. Административный полышат кӱлеш. Тиде направлений дене пашам ышташ тӱҥалына.
Денис Смирнов
Волжский район
Авторын фотожо
Материалым М.ИВАНОВА марлаҥден
Опубликовать в Одноклассники

Добавить комментарий