Тений сентябрь тӱҥалтыште Марий Эл Российысе финн-угор калык-влакын кугу форумыштым вашлияш тӱҥалеш.
Тидын нерген Марий Эл вуйлатыше Юрий Зайцев Россий печать кечын журналист-влак дене вашлиймыж годым каласен. Кугыжаныш политикым виктарымаште, финн-угор калык-влакын шанче, тӱвыра, йылме да моло кылым умбакыже вияҥдымаште ик эн кӱлешан мероприятий семын палдырна манын регион вуйлатыше.
Форум 2021 ий гыч кажне кок ийын чумырга. Тылеч ончыч тудо Удмурт ден Мордовий республиклаште лийын.
Адакше Россий Федерацийысе финн-угор калык-влак ассоциацийын (АФУН) черетан погынжымат эртараш жап шуэш. Сандене тиде пагытыштак чумыраш лийме.
Нине йодышым вӱргечын Марий Эл вуйлатыше Юрий Зайцев ден АФУН председатель Пётр Тултаев каҥашеныт. Вашлиймаште тыгак Марий Эл правительстве председательын алмаштышыже — тӱвыра, савыктыш да калык паша шотышто министр Константин Иванов, Марий Эл Кугыжаныш Погын председатель, АФУН председательын алмаштышыже Михаил Васютин лийыныт.
Юрий Зайцев:
Пеҥгыдын каласен кертам, мероприятий-влак сай кӱкшыт дене эрташ тӱҥалыт, ме уна-влакым кумылын вашлийына да финн-угор-влакым тургыжландарыше йодышлам кугу тӱткышым ойырена.
Марий Элын тыгай кӱкшытан мероприятийым ямдылыме да эртарен колтымо шотышто опытшо кугу. 2024 ийымак налаш — регион-влак кокласе Пеледыш пайрем, федерал Сабантуй, Марий калык погын… Эсогыл йӧратыме Пеледыш пайремна у кӱкшытыш лектын — тудым элнан рӱдолаштыже илыше ден унаже-влак ВДНХ-ште ужын аклен кертыныт.
Федераций Советыште Мордовий Республикысе законодательный кучем деч сенатор Пётр Тултаев тыгак Марий парламент вуйлатыше Михаил Васютин дене вашлийын. Нуно регион ден федерал кӱкшытысӧ законодательствым уэмден шогымо шотышто темлымашышт дене пайлалтыныт, АФУН-ын паша планжым каҥашеныт.
Тиде кечынак Пётр Николаевич финн-угор толкынышто улшо икмыняр меръеҥ дене вашлийын.
Пётр Тултаев:
Форум финн-угор самырык тукымлан пӧлеклалтеш. Писын вашталт шогышо илыш пӧрдемыште ӱдыр-рвезе-влак могай корнышто улыт, нунын шочмо кундемым, элым йӧратыме кумылыштым кузерак вияҥдаш? АФУН погынат калыкна-влакын кӧргӧ чон поянлыкышт дене кылдалтше лиеш.
Светлана Пехметова
Снимкыште: Константин Иванов, Юрий Зайцев, Пётр тултаев да Михаил Васютин.
Денис Речкинын фотожо