Муниципалитет-влак республикысе медицине организаций-шамычлан транспорт дене полшат.
Коронавирусын пандемийже пагытыште COVID-19 дене черланыше пациент-влаклан медицине полышым пуышо инфекционный стационарлаште веле огыл, амбулаторий ден поликлиникылаштат паша, манмыла, сутка мучкылан сита. Мут толмашеш, пытартышыжлан амбулаторный пациент-шамычлан эше эмым кондыштараш кӱлеш, а тидлан транспорт огеш сите.
Проблемын нелылыкшым умылен, Россий Федераций правительстве председатель Михаил Мишустин муниципальный образований администрацийлам вуйлатыше-шамычлан предприятийым вуйлатыше-влак дене пациент-шамычым обслуживатлыше медорганизаций-влаклан транспортым ойырымо шотышто мутланаш кӱштен.
Предприятийым вуйлатыше-шамыч республикыштына у коронавирус инфекций дене кылдалтше ситуацийын нелылыкшым умыленыт да Йошкар-Оласе, тыгак районласе амбулаторий ден поликлинике службылан 25 автомашинам ойыреныт, ты шотышто 6 транспортым – жаплан, 19 машинам – медицине организаций-влакын йодмышт почеш.
Отрасльын вияҥме корныжым палемдыме годым Российын тазалыкым аралыме министрже Михаил Мурашко палемден: шушаш ийын первичный медико-санитарный полышым модернизоватлыме программе ик эн тӱҥ лиеш.
Программын ужашыжым илышыш уже пурташ тӱҥалме – ешартыш транспортым 2021 ийыште огыл, а тенияк налме, да декабрьыште Марий Элыш медицие организацийын первичный звеножлан 13 автомашинам колтат.
Россий Федераций правительствын резерв фондшо гыч Марий Эллан у коронавирус инфекций деч профилактикылан да черым эмлашлан ешартыш средствам ойырымо. Тений декабрьыште оксан ужашыжым регионысо амбулаторий да поликлинике звенолан куд автомашинам налаш колтымо.
М.ИВАНОВА
