ТАЗАЛЫК

Теҥгече – студент, таче – врач

Республикысе клинический больницыште Российын медицине вузлаштыже 5-ше курсым тунем пытарыше студент-влак Тазалыкым аралыме министерствын еҥже да медицине организацийлам вуйлатыше-шамыч дене вашлийыныт. 

Аудиторийын утларак ужашыжын целевик-шамыч улмым шотыш налын, тазалыкым аралыме министрын алмаштышыже Т.Бастракова нунын вич ий ончыч целевой йӧн дене тунемаш ойпидышым ыштымышт годым налме обязательствыштым ушештарен. Тудын тӱҥ йодмашыже – вуз деч вара республикыште вич ий пашам ышташ. Условийым шуктыдымо студентлан штраф пуалтеш.

Минздравын кугыжаныш гражданский службо, кадр паша да правовой обеспечений пӧлкажын начальникше Е.Рокина студент-шамычым ординатурышто тунемме у правил да регионысо медицине тӧнежлашке лачшымак могай специалист-влак кӱлмӧ дене палдарен.

Тӱҥ врач-шамыч первичный аккредитацийым эртыше самырык специалист-влаклан пашам могай условийыште ышташ логалмышт нерген каласкаленыт. Нунын кокла гыч кажныже самырык врачлан лачшымак тиде тӧнежыш пашам ышташ толаш сай амалым ончыктен.

Аҥысыр специальностьян врач лияш шонышо-влаклан шонкалаш жап моткоч шагал кодын – сентябрьыште нуно ординатурышто тунемаш кумылан улмышт нерген йодмашым возышаш улыт. А таче тудын бюджет верлашкыже логалаш куштылгыжак огыл: кумытанзе-шамычлан корно петырналтын гаяк.

Ик ий гыч Марий Эл гыч 115 целевик медицине университет ден академийым тунем лектеш. Нунын кокла гыч ик ужашыже Юл кундем федеральный округын олалаже-влак кокла гыч иктыштыже ординатурышто шинчымашым умбакыже погаш, молыжо республикысе поликлиникылашке толыт да опытан врач-влакын эскерымышт почеш участковый терапевт, участковый педиатр, тӱшка практике врач семын приёмым эртараш тӱҥалыт.

Снимкыште: тений Самара медицине университетым целевой йӧн дене тунем пытарыше Диана Брендинат лишыл жапыште Йошкар-Олашке пӧртылеш да участковый терапевтлан пашам ышташ тӱҥалеш

Авторын фотожо

М.ИВАНОВА

Опубликовать в Одноклассники

Добавить комментарий