«Тазалык» национальный проектын «Икшыве-влаклан медицине полышым пуаш кызытсе жаплан келшыше инфраструктурым ыштен, йоча здравоохраненийым виядыме программе» региональный проектын цельже республикыштына идалыкаш марте йоча-влакын колымо чотыштым 2024 ийлан илыше шочшо 1000 азалан шотлымаште 3,9 марте иземдымашке виктаралтын. 2019-2020 ийлаште Марий Элысе йоча поликлинике ден поликлинике отделенийлашке келшыше оборудованийым тичмашын ситараш да, изи пациент-шамычлан каньыле лийже манын, медицине организаций-влакын кӧргыштым йӧнаным ышташ палемдыме.
Тиде кок ий жапыште 86 едицине медицине оборудованийым налаш палемдыме. Тидлан 134 млн. теҥгем ойырымо. 67 млн. теҥгеш шушо 10 единице медоборудованийым тенияк налын шындышаш улыт.
Август тӱҥалтыш марте конкурент процедурым эртарыме да 9 единице медоборудованийым конден шындаш контрактым ыштыме, 12 каналан кок электрокардиографым пашаш колтымо.
Налме оборудованийым вераҥдаш палемдыме кумдыкым ямдылаш республикын бюджетке гыч 2,3 млн. теҥгем ойыраш лийме. Август тӱҥалтышлан Республикысе йоча клинический больницыште 1,11 млн. теҥгеаш компьютер томографым шындаш келшыше кумдыкым тӱрыснек олмыктымо.
Йошкар-Оласе 5-ше №-ан йоча поликлиникын, Волжск оласе рӱдӧ больницын да Козьмодемьянск межрайонный больницын йоча поликлиникылаштын кӧргысӧ кумдыкыштым утларак йӧнаным ышташ контрактым ыштыме, тудын суммыжо – 7,27 млн. теҥгеш. Палемдыме пашам 12 сентябрь марте ышташ шуктышаш улыт.
Республикысе йоча поликлиникылаште планировкым вашталташлан чылаже 14 млн. теҥгем ойыраш палемдыме.
М.ИВАНОВА
