ТАЗАЛЫК

Тургыжланаш амал уке

Коронавирусын Казаньыште веле огыл, тудын йыр верланыше кундемлаштат вийым налын кертмыж шотышто шучко манеш-манеш кечын шарла. А чылажат тышечын тӱҥалын…

23 февраль эрдене Татарстан Республикысе клинический инфекционный больницыш коронавирус дене авалталтше Diamond Princess турист судно гыч МЧС-ын спецбортшо дене кандаш еҥым конденыт. «Вашкеполыш» машина-влак нуным трап воктенак вашлийыныт да, аэровокзалыш пуртыде, вигак эмлымверыш наҥгаеныт. Верысе калык ӧрын: нине еҥым молан лачшымак Казаньыш эвакуироватленыт?

– Икымше, кандаш турист кокла гыч нылытынже, ты шотыштак ик йоча, мемнан республикын гражданинже улыт. Кокымшо, мемнан чыла йодмаш да нормо дене келшен толшо, тыгак лӱмын туныктымо персоналан больницына уло, да тудо нине еҥым приниматлен, эскерен да эмлен кертеш, – калыкын умылыдымашыжым рашемден Татарстан Республикын президентше Рустам Минниханов.

Больницыште пациент-влакым Российын Роспотребнадзоржым вуйлатыше А.Попова ден Татарстан Республикын президентше Р.Минниханов вашлийыныт. Круиз лайнер гыч эмлымверыш кусарыме турист-шамыч чыла медосмотрым эртеныт, анализым сдатленыт. Казаньыште «Вектор» лабораторийын – Новосибирскысе науко рӱдерын – специалистше-влак пашам ыштат.

Россиян-влакым посна бокслашке вераҥденыт. Карантин жапыште нунын дене кум врач, куд медсестра да кум санитарке лийыт, манмыла, 14 кече, тӱжваке лекде, пырля илат. Бокс-влак верланыме блокым Росгвардийын пашаеҥже-шамыч оролат.

Казаньысе инфекционный больницыште чыла боксым посна ойырымо, пациентын илышыжлан мо кӱлешым палатыштак йӧнештарыме. Шымлымашке мойн лекше черле-влак икте-весышт дене огыт вашлий – клинике лабиринтым ушештарыше шуко коридоран.

Эвакуироватлыме кандаш еҥ кокла гыч кумытшын организмыштыже коронавирусым мумо. Но Татарстан Республикын Тазалыкым аралыме министерствыжын 26 февральыште увертарымыж почеш, чыла пациент ден медперсоналын тазалыкышт сай, нуным кече еда тергат.

М.ИВАНОВА

Опубликовать в Одноклассники

Добавить комментарий