Шукерте огыл Москошто национальный костюмым ончыктымо 18-ше гана «Этно-Эрато» конкурс эртен.
Тынар ий жапыште моткоч шуко самырык этно-дизайнер мода тӱняш корным почын. Тыгай конкурс Евразийысе калык-влакын вургем ойыртемыштым, моторлыкыштым ончыкташ да ужаш йӧным ышта.
Ты гана «Этно-Эрато» конкурсыш Волжский районысо Порат кундемеш шочын-кушшо самырык дизайнер Евгения Кошкина у вургем коллекцийже дене ушнен. Тудым «Марий сем» манын лӱмден.
Конкурсыш Крым гыч тӱҥалын Мӱндыр эрвел марте улшо регионла гыч да Евразийысе шым эл гыч участник-влак ушненыт. Марий ӱдырын пидме вургемже жюрилан келшен, профессионал модельер-влакат тудын пашажым кӱкшын акленыт. Тыге Е.Кошкинан пашаже 50 коллекций гыч лу эн сай коклашке логалын да тудын коллекцийжым уэш Моско Правительствын кугу залыштыже эртыше гала-концертыште ончыктеныт.
У ий вашеш, Евгения Александровна, пӱтынь марий калык деч таумут да сеҥымашет-влак дене саламлыме мутнам налза.
А.Байкова.
(Фотом еш альбомжо гыч налме.)