«Музыка Земли» фестиваль-конкурсыш Российын 70 регионжо гыч, тыгак Болгарий, Германий, Испаний, Италий, Франций, Японий гыч участник-влак йодмашым пуэныт. Тушко Марий Эл гыч Россий культурын сулло пашаеҥже, “За заслуги перед Марий Эл» орденын медальже дене палемдалтше, И.Палантай лӱмеш кугыжаныш премийын лауреатше, уста гармонист Арсений Яйцов да самырык мурызо Ирина Юшкинат ушненыт.
— 1 гыч 3 ноябрь марте Глинки лӱмеш рӱдӧ музык тоштерыште ойырен налме тур эше ик гана эртен. Сеҥыше-влакым вич номинацийыште палемденыт. Чылаже 24 коллектив финалыш лектын. Ме дипломант лийынна, — миен коштмышт дене паладарыш Ирина Юшкина. — Но туге гынат мемнам, Арсений Яйцов дене когыньнам, гала-концертыш ӱжыныт.
Фестивальын гала-концертше 4 ноябрьыште П.Чайковский лӱмеш концерт залыште эртен. Россий, тӱнямбал артист-влак дене пырля курыкмарий ӱдыр «Кидыштем шӓргӓшем» мурым акапельно мурен. Тиддеч вара Арсений Яйцовын гармоньым шоктымыж почеш «Шика-вика» мурым йоҥгалтареныт.
— «Музыка Земли» фестиваль-конкурсыш миен толмо шуко жаплан поро шарнымашым кода. Тушто тӱрлӧ коллектив, кумдан чапланыше артист да мурызо-влак дене палыме лияш йӧн лектын, — ойла И.Юшкина. — Российын сулло артистше, кумдан чапланыше пианист, мероприятийын ик организаторжо Борис Березовский, журналист, фестиваль-конкурсым вӱдышӧ Михаил Зеленский, Российын сулло артистше Галина Власёнок да моло денат палыме лиймым пиаллан шотлыман.
А.Байкова.
(Фотом И.Юшкинан альбомжо гыч налме.)
