1 апрельыште меман кугыжанышыште всероссийский перепись тӱҥалеш. Переписчик-влак калыкыш лектын коштмо тыглай йодыштмаш дене пырля ты пашам цифр формат денат эртараш тӱҥалыт. Тидын нерген кодшо кечылаште Марий Элыште всероссийский переписьлан ямдылалтме да тудым эртарен колтымо шотышто республиканский комиссийын заседанийыштыже увертареныт.
Тудым Марий Эл правительстве председательын икымше алмаштышыже Михаил Васютин вӱден. Видеоконференций форматыште заседанийыш республикысе чыла муниципальный образований гыч ответственный еҥ-влак ушненыт.
Ончыктен кодыман, кодшо ийланак палемдыме переписьым коронавирус эпидемий шарлымылан кӧра тенийлан кусареныт. Тудым эртараш Марий Элыште ямде улыт. Михаил Васютинын ойлымыж почеш, кажне илемыште пӧрт-влакын адрес спискыштым, картографий материалым уэмдыме, оласе округ, муниципальный район-влак кӱкшытыштӧ организационный планым ыштыме, переписной ден станционар участкылам вераҥдаш пӧлем-влакым ойырымо. Ончылгоч тергыме почеш ты паша 80 процентлан шукталтын.
«Переписьым эртараш 1887 еҥым ушыман. Тачысе кечылан 1873 еҥжым ойырымо. Кугу паша деч ончыч персоналым туныкташ тӱҥалына», — палемден Маристат вуйлатыше Александр Целищев.
Тудын ойлымыж почеш, переписчик-влакын экипировкышт ситышын толын, тиде – удостоверений, шарф, сигнальный жилет, портфель, саҥгаш пижыктыме фонарь да эше пийым лӱдыктышӧ арвер. Тыгак Росстат эше переписьым эртарыше персоналлан маскым, перчаткым, переписной участкылаш температурым висыме контактдыме прибор-влакым ситышын колтышаш.
Заседаний годым адресный озанлыкыште ситыдымашым кораҥдаш кӱлмӧ нерген ойлалтын. Мутлан, Йошкар-Олаште да икмыняр муниципальный образованийыште урем-влакын лӱмыштым, пӧрт-влакын номерыштым ончыктышо указатель огыт сите.
Республикысе правительстве председательын икымше алмаштышыже районлаште переписьлан ямдылалтме пашам саемдаш йодын. Эшежым ты шотышто калык денат умылтарымаш пашам эртарыман. Тыгак еҥ-влаклан переписьыште могай йӧн дене участвоватлаш лийме шотышто инструкций ден памяткым ямдылаш кӱштен.
Заседаний годым М.Васютин регион вуйлатышын кӱштымыжым шуктен: Маристат вуйлатыше А.Целищевлан «100-летие образования Марий Эл» шарнымаш медальым кучыктен.
Марий Эл Республикым вуйлатышын Организаций да аналитике виктемжын уверже негызеш С.Носова ямдылен.
