Морко поселкышто курыкышто куржталмаш дене Россий Гран-прин 20-шо этапше, Морко районын открытый первенствыже эртеныт. Таҥасымаште шӱдӧ утла спортсмен вийым терген. Куржталаш йӧратыше ветеран-влак дене пырля стартыш Морко, Унчо, Волаксола, Арын, Коркатово, Шӱргыял школлаште тунемше-влак лектыныт.
Абсолютный сеҥыше семын Кострома гыч уна, куштылго атлетике дене спорт мастер Эдуард Архипов палемдалтын. Куржталаш йӧратыше-влакын «Марий Эл» командышт (вуйлатышыже — ветеран-влак коклаште курыкышто куржталмаш дене Российын чемпионжо, отставкысе милиций полковник Василий Кузнецов) шкенжым сай велым ончыктен.
Шке ийготан-шамыч тӱшкаште куштылго атлетике дене спорт мастер Валерий Романов, командын капитанже Вячеслав Мартьянов, Ильхам Мухамедзянов, Вениамин Хмелев, Андрей Кугергин, Зоя Рябчикова сеҥышыш лектыныт.
Российын Гран-прижын колымшо этапше почеш ветеран-влак коклаште лач ты команде ончыл верыште кая. Команде вуйлатыше В.Кузнецов «Фарб» орол предприятийын генеральный директоржо А.Ильинлан, «Витекс» ООО-н директоржо Ю.Ведушевлан таҥасымашым эртараш полшымыштлан таум каласа.
Курыкышто куржталмаш дене таҥасымашын черетан этапше тений 1 октябрьыште Нижний Новгород олаште эрташ тӱҥалеш, а 28 октябрьыште Москваште чемпионатын финалже лиеш.
А.АНДРЕЕВ.
Снимкыште: Сеҥыше «Марий Эл» командын спортсменже-влак
тунемше-шамыч дене пырля.
В.Кузнецовын фотожо.
