Советский районышто эше ныл вере – Кугунур ден Шӱльыдӱр яллаште, Голубой ден Солнечный посёлкылаште – илыше-влакын пӧртышкышт (чылаже 689 суртыш) пӱртӱз газым пуртымо. Кугунур ялыш «канде тулым» пашаш колтымо кечын тушто Марий Элым вуйлатыше лийын.
Тиде татым калык лу ийла дене вучен, санденак факелыш тулым ылыжтыме йӱлам совым кырен да «Ура!» шомак дене вашлийын.
Чумыр налмаште 27,5 километр кужытан газ пучым шупшмо паша 2021-2025 ийлаште республикыште газым пуртымо сомылым вияҥдыме программе почеш ышталтын. Тений апрельыште тиде документыште тӧрлатымаш лийын: Марий Эл правительстве ден Газпром могырым тушто палемдыме инвестицийым 2,7 пачаш кугемдыме, тыге тудын кугышто 13,5 миллиард теҥге лийын.
«Чоҥышо-влаклан тауштыман. Нуно ик вере огыл, а ныл ял ден посёлкым авалтеныт. Шыже, теле шкеныштым огыт вучыкто, сандене ты пашам жапыштыже ыштымылан моткоч куаненам», – каласен Юрий Зайцев.
Тудо палемден: Марий Эл правительстве регионышто улшо чыла кундемыш «канде тулым» пурташ палемден. «Газпром распределение Йошкар-Ола» ООО-н генеральный директоржо Александр Ерёминын мутшо почеш, объективныйлан шотлалтше амаллан кӧра чоҥымо паша кужун шуйнен, туге гынат тудо ышталтын. «Ме мобильный офисым ӱжынна. Йодмашым пуыза, газ пучым мланде кумдыкда марте яра шупшына», – каласен тудо.
«Пагалыме Юрий Викторович, Тыланда да Марий Эл правительствылан мемнан калыкын пӱсӧ йодышыжым решатлымылан таум ойлена. Ты ялыште пӱртӱс газым шуко ий вученыт, сандене калыклан тиде – кугу событий», – каласен Советский район администрацийым вуйлатыше Антон Трудинов.
Юрий Зайцев, Александр Ерёмин да Антон Трудинов Кугунур ялыште илыше Григорьевмытын пӧртышкышт «канде тулым» пуртымаште лийыныт.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
