Марий Эл – икымше верыште!
Марий Эл Юл кундем федеральный округын регионжо-влак коклаште коронавирус деч паремше-шамычын чотышт дене икымше верыш лектын.
Коронавирус дене кылдалтше ситуацийын мониторингше шотышто увер рӱдерын 30 июньысо данныйже почеш, COVID-19 дене черланыме 2959 случай гыч 2824 пациент (95%) черым сеҥен кертын да стационар гыч паремын лектын. Тиде показатель дене Марий Эл Юл кундем федеральный округын регионжо-шамыч коклаште икымше верыш логалын.
У коронавирус инфекций деч паремше пациент-влакын кугу чотышт дене тыгак Пенза область (94%) ден Татарстан Республик (81%) ойыртемалтыныт.
COVID-19 деч паремше пациент-влакын чотышт поснак Ульяновск, Саратов, Самара областьлаште да Башкортостан Республикыште изи.
Юл кундем федеральный округышто у коронавирус инфекций дене черланыме чумыр случай гыч 48328 еҥ (66%) паремын.
М.ИВАНОВА
