Марий Элыште эрык деч посна кодымо кажне луымшо еҥ ВИЧ дене орлана.
Черле-влак поснак ӱдырамаш колонийыште шукын улыт. Тушто тыгай шучко диагнозан 80 утла еҥ шинча, тидыже кажне кумшо ӱдырамашын черле улмыж нерген ойла.
Эрык деч посна кодымо ВИЧ-инфекциян чыла черлым диспансер учётыш налме. Нине еҥын вӱрыштым иммунный статуслан да вирусын нагрузкыжлан тергенак шогат. Флюорографий шымлымашымат план почеш эртарат. МСЧ-12 гыч врач-инфекционист Наказанийым шуктымо виктемын чыла тӧнежышкыже консультацийым пуаш, эмлыме йӧным палемдаш лектын коштеш. Кызыт антиретровирусный терапийым 113 еҥ эрта, тидланже чыла эм централизованно да жапыштыже ойыралтеш.
Тений Наказанийым шуктымо виктемын учрежденийлаштыже ВИЧ-инфекцийын 24 случайжым икымше гана рашемдыме, тиде показатель кодшо ийла деч палынак кугу. Черын чыла случайжым шындыме еҥын карантиныште икымше тергымашым, шымлымашым эртымыж годымак пален налме. Тыгодымак медик-шамыч ВИЧ-инфекций дене лачшымак тӧнежыште черланыме ик случайымат регистрироватлен огытыл.
М.ИВАНОВА.
